“Ka ri Thlen ka don, ka Taro pat kam dei ka jingri dei ka phan ka kyrpad”

Shillong,23 Nailar:
Ki la mih bun ki jingpynshai bad ki jingai jingmut halor ka kam Ri-Thlen, Taro Men-Aiksuid kaba ki ba bun ki riewpawkhmat naduh ki phadar ki pastor ki la ia pynpaw ha la ka jong ka jingsngewthuh bad ka jingtip jong ki. Ha ki taiew ba la dep u Rupang u la pynmih ia ka jingkren jong uwei na ki nongialam rangbah jong ka Sengbah ki nongshat nongkhein halor ka kam Men-Ai-Ksuid mynta pat ngin ia pule kaei ba utei u rangbah u Bah Pran Jala Vice President ka Sengbah ki Nongshat Nongkhein u la batai sa ia ka kam Men-shohnoh ne Ri Thlen bad ka kam Taro.
U Bah Pran u la ong ba Mynhyndai hynthai haba dang hok ka pyrthei ka jingim jong ki briew ka long shisur hynrei katba nangiaid ki por bad ki sngi ha ka jinglong briew , ki briew ki la sdang ia ka rep ka riang , ka ri ka dup bad la ia roi ia par ki kur ki jait , ki ia pang ia shitom ruh , ki duna ha ka jingmut jingpyrkhat bad ki la ia kynduh ruh ia bun ki jingeh ha kaba ki jingri jingdup ki shu iap, ka khaii ka pateng ruh ka hiar bad kumta ter-ter.
Haba iohi ia kane u kni rangbah u la ong ha la ki para ki pyrsa , ki kur ki doh ki snam ‘Nga I synei , nga I pangnud ba phi ia jynjar ia kyrduh kumne’ Kumta u la lum ia ki kur ki pyrsa , ki ruh ki sngewiahap bad ki la ia pyrkhat ban sieh noh da u kni u ban duwai kyrpad ban kyrkhu kyrdoh ba kin san kin plung ki jingthung jingtep, ban roi ki jingri jingdup , ka kamai ka kajih bad ka khaii ka pateng bad ki synniang hangta katba ki sngewioh ka pisa ne da ki sbai.
Hadien ba ki sieh ia uta u kni u ban duwai ban panmap na ki Blei bad ban kyrsoi kyrsiah ban ia biang ia bit ban ioh bam ioh dih, ka ing ka sem , ki ksiar shad siar kmen.
Kan kit ka meiramew ban pyntip sha ki blei da kaba shim ka khnong , ka bishar ha ka nam ka kyrteng u kni u nongkyrsoi kyrsiah bad haba uta u kni u la kyrsoi kyrsiah ki la ia ong ruh ia u ba kin ym klet hynrei kin khublei ia u manla u snem ha kaba ki sieh da u masi,sniang,blang syiar bad kiwei, iathuh khana u Bah Pran.
U tei u rangbah u la bteng biang ia ka khana jong u ha kaba u la ong ba Katba nangiaid ki por uta u phan u kyrpad u kylla ksuid pynban ha kaba u ju wan mih ha ka dur jong u miaw uba phylla, u bsein ha ing ha sem bad u la dawa kylla na ki ba mynta ym donkam shuh ban phan ban kyrpad da u masi u blang, u syiar hynrei donkam pat da ki niuh khlieh, simkti simkjat jong u khun bynriew.
Em ! ki la kyrngah ia kata ka jingdawa uta u phan u kyrpad jong ki da kaba ong ba ki pangnud ia la ka doh ka snam bad ki khun ki kti lajong bad ki la ong ruh ba kam don hi kata ka hukum blei ban leh kumta, hangta u la ong ia ki em ym dei ba nga pan ia ka doh ka snam bad ki khun ki kti jong phi hynrei ba ki dei ban leit beh leit wad sha Mihngi Sepngi ia ki jem ka rngiew ka rwiang da kaba ruh ba un kyrkhu kyrdoh ia ki jingthung jingtep ki jingri jingdup bad ka kamai ka kajih jong ki bad un pynryngkang pynryngkoh ia ki ha ki wah ki um, ki khlaw ki btap bad u la byrngem ruh ba lada kim kohnguh un pynduk pynkyrduh ia ki.
Te ki la ia shong pyrkhat hangta bad haba ki sngewthuh ba u la ong ba lada ki leit beh leit wad un don ryngkat bad ki ki la kohnguh bad ki la sdang ia katei ka kam kaba ki Khasi ki ong ‘U Thaw-ar’ ( kiba lalot kiba kangar, kiba kwah spah jubor bad tam lah ia ka hok blei).
Dei halor kitei ki jingiathuh khana u nongialam jong ka sengbah ki nongshat nongkhein u la ong ba ka ri-Thlen ne ka Men-shohnoh ka don.Haba la kylli pat shaphang ka khana jong ka Dainthlen utei u rangbah u la ong ba katei ka la jia ha shuwa ka Dainthlen.
“Ha pdeng ki shikur kim long ri Thlen lut don tang iwei ne ar uba pain ban shong ban sah uta u kni uba kylla thlen bad um ju pyni ialade bad hateng u pyni kum u ksain. Hadien ba kim lah shuh u sa dait kylla ia ki bad ki duk tasam” iathuh u Vice President ki nongshat Nongkhein.
Haba phai sha ka kam Taro u Bah Pran u la ong ba ka Taro kam dei ka ingri hynrei ka dei tang ka phan ka kyrpad jong ki briew ban ioh spah ioh hajar ba kan kynshew kyndiap ia ka kamai ka kajih jong ki ha ka khaii ka pateng.
Ka leit ban lum ban lang ia ka ram ka shah ba kita ki nongphan nongkyrpad ki sah ha ki briew , Lada jia ba ki briew kim siew ia ka ram ka shah ka leit dait ia ki, hynrei ym d3ei ba phah kita ki trai ka leit hi” ong u Bah pran.
Utei u rangbah u la pyntip ba ka Sengbah ki Nongshat Nongkhein ka lah ban law ban loit ia ki thlen, Taro lada ki kwah ryngkat ka jingwanrah jong ki ia ki sakhi satar.