Shillong, 4 Nailar:
U pulit CID barim jong ka Meghalaya, U Anjan Chakraborty, ula shah kem mynta ka sngi, ha ki pulit jong ka nongbah Shillong, ha ryngkat bad ki pulit jong ka Kolkata na Khyndailad, hajan ka State Bank of India, Evening Branch, na ka daw ka jingleh thok pisa ha Kolkata.
U Anjan, u donkti ha ka jingthok pisa kaba shongdor T.2.5klur, ha kaba ula thok pisa ia shibun bah ki briew ha Kolkata, da kaba kam ialade kum U Assistant Commissioner of Police.
Ka jing ujor, la buh ha Ekbalpore PS ha Kolkata, ha kaba la ujor ba ha shwa ka 19tarik Naitung 2017, U Chakraborty, ula leh thok ha ka kyrteng jong ki pulit ka Kolkata bad ula pynbor ia shibun ki briew ban siew pisa ia u, ha kaba don kiba hap siew T.2.5lak, don kiba hap siew T.1lak bad kumta ter ter na shibun ki briew.
Kane kam dei ka sien nyngkong ia U Anjan, hynrei kham mynshwa ha u snem 2014, la ujor ha Shillong Sadar police station, ba utei u juh u briew, u donkti, ha kaba thok pisa kaba shongdor T.19,50,000 bad sa kiwei de ki jingshah thok ha ki dor bapher bapher.
Ha U Nohprah 2015, la kem ia U Chakravorty, halor ki jingdonkti pyniap briew bad ha ka 27tarik Naitung 2017, la sospon noh ia ka jing ai identity Card ia utei u pulit, uba la shongthait. La iathuh da ka khubor ba la kit noh mar mar sha Guwahati mynta ka sngi ia U Anjan bad ban ialam ia u, lashai ka sngi sha Kolkata.