Shillong, 28 Naitung:
U President ka BJP u Amit Shah, un iakynduh ia ki MLA ha kane ka jylla ha ka por ba un wan iuhkjat ha u bnai ban wan kiba lah ban iasoh bad kane ka party. Katkum ka jingong u President ka BJP Meghalaya u Bah Shibun u Amit Shah un wan hapdeng ki 15 tarik shaneng jong u bnai ban wan.
U Bah Shibun u la ong ba ha kane ka jingwan jongu president rangbah, un iakynduh ia ki MLA kiba thmu ban pyniasoh bad ka seng, kynthup wat na ka Congress.
Mynta ka sngi, u national coordinator ka BJP u Arvind Menon u la wan sha ka nongbah ha kaba u la iakynduh ia ki nongialam ka party ban pynkhreh ia ka elekshon bad ban pynkhlain ia ka party ha kane ka jylla.
Watla u Bah Shibun u la ai dak ba ka jingrung jong kiwei ki MLA sha ka BJP shwa ka elekshon kan long kaba thikna, hynrei um treh ban iathuh ia ki kyrteng jong ki.
U la ong ba u general secretary ba peit ia ka elekshon u Bhupendra Yadav un sa wan sha ka jylla ha u bnai ban wan ban plie ia ka ophis ka seng.