Shillong,24 Naitung:
Ki samla pule jong ka Sohra Goverment College, mynta ka sngi ki la leit ia kynduh ia ka myntri ba peit ba ia tnad Higher and Technical Education ka kong Roshan Warjri ha kamra treikam jong ka ha Secretariat ban pynpaw ia kiba bun ki jingeh ba katei ka kolej sorkar kaba don ha Saitsohpen, Sohra ka ia kynduh. La synran lang ia kitei ki samla da u MDC ka Sohra konstitwensi u bah Donevan Kharwanlang.
Haba kren sha ki nongthohkhubor hadien katei ka jingiakynduh myntri, u President jong ka Sohra Goverment College Student’s Union u samla Ethylberth Khongrymmai u la ong ba la pynpaw sha ka myntri ia ka jingduna nonghikai na bynta ka sobjek Education ( Education department) bad ka myntri ka la kular ba shen yn sa phah noh 2 ngut ki nonghikai kiba dang don mynta ha Williamnagar. Ki la iathuh ba ar tylli ki kam nonghikai ha ka sobjek Education ka la thylli naduh u snem 2015 bad 2016 naba ha u 2015 uwei u nonghikai u la risaiñ noh na ka kam katba ha u 2016 uwei pat u nonghikai u la shongthait noh.
Ki la ia kren ruh ia ka jingdonkam ban buh sa uwei u Additional Lecturer bad ia katei ruh ka myntri ka la bthah ia u Principal katei ka kolej ban buh jingthoh sha ka khnang ban ioh leh ia kaba donkam.Ha kaba ia dei bad ka jingdawa ban pynheh ia ki kamra klas namar kumba ka long mynta ka la khapngiah palat na ka jingbun ki samla pule, ki nongialam katei ka Union ki la ong ba la pyntip sha ki ba ka la don ka skhim kaba la mang T.1.40 klur tyngka (Shi klur saw phew lak tyngka) na ka Rashtriya Uchchatar Shiksha Abhiyan ( RUSA) ha kaba yn pyntreikam noh shen.
U MDC ka Sohra u bah Donevan Kharwanlang haba kren sha ki nongthohkhubor u la ong ba naduh ba la khang ia u dewiong , u mawshun ka kamai kajih ha ka thaiñ Sohra, ka la hiar shaba palat ha kaba ki kmie ki kpa kim lah shuh ban phah pule ia ki khun jong ki sha Shillong ne shabar bad kumta ki hap ban phah ia ki khun jong ki sha katei ka kolej kaba don hajan jong ki.Na katei ka daw ka la don ka jingia tyngngian kaba jubor ha katei ka kolej mynta bad ka jingkhapngiah ka long kaba la palat kaba ki samla pule ki hap ban shong haduh 5 ne 6 ngut ha kawei ka ben ruh. U la ong ba kum u MDC um shym la lah ban leh lut ia kitei kiei kiei kiba donkam ia katei ka kolej watla u la don eh ka mon bad ka mynsiem ban iarap, u la pynkynmaw ba u la dep ban ai skhim na ka MDC Scheme jong u na ka bynta ban shna pynheh ia ki kamra klas.
Shuwa ba kin leit ia kynduh ia ka myntri sorkar ki samla pule ka Sohra College ki la leit ban ia kynduh ia Director ka tnad DHTE ban ai ia ka jingthoh kiba dei ki mat jingdawa jong ki; hynrei kham hadien u Director bad u Joint Director ki la wan lang sha katei ka jingiakren kaba long ha kamra jong ka myntri sorkar.