Pan nongbishar shuh ka sorkar ha Meghalaya High Court

Shillong, 20 Nailar:
Ka sorkar Meghalaya ka la pan nongbishar shuh na ka sorkar kmie na ka bynta ka Meghalaya High Court na ka bynta ban pynsted ia ka jingbishar ia ki mukotduma.
U Symbud Myntri Rangbah ka jylla u Bah Rowel Lyngdoh u la ong ba ka sorkar jylla ka la thoh sha ka sorkar pdeng ban ai shuh sa uwei u nongbishar ha kane ka Kashari ha jylla khnang ban pyniaid kham sted ia ka jingbishar.
Kumba ka long mynta ka High Court ka Meghalaya kam pat ioh ia u Chief Justice hadien ba ka T Meena Kumari ka la shong thait ha u bnai ba la dep.
Haba kren sha ki nongthoh khubor hynne ka sngi, u bah Rowel u la ong ba ka sorkar ka la dep phaha ia ka shithi sha ka sorkar pdeng ban wanrah shuh sa uwei u nongbishar ha ka High Court ha kane ka jylla.
Ka High Court mynta ka don ar ngut ki nongbishar u Justice T. Nandakumar Singh uba shimti shipor kum u Acting Chief Justice namar bym pat thung ia u Chief Justice bad sa uwei u Justice Sudip Ranjan Sen.
Katkum ka jingong u Bah Rowel ka sorkar jylla ka dang ap ia ka jingthung ia u Chief Justice na ka sorkar pdeng bad na ka liang ka tnad kam ain ka jylla, ka dang buddien ban pynsted ia kane ka kam.