“U Bah Shylla, u dang dei uba rim, um pat dei uba thymmai”

Shillong 05 Naitung:
“Ka jingpdiang ka UDP ia u Bah HS Shylla sha ka party shwa ka elekshon MDC shiteng samoi, ka dei namar ba ka Nongkrem UDP kaba ong ia ngi ba u Shylla ba mynta um dei shuh u Shylla ba mynshwa”, la ong u Dr Donkupar Roy haba kylli mynta ka sngi, ia kaei ka jingsngew jongu, ia ka jingshet biang u Bah Shylla ia ka UDP.
U President ka UDP u la ong ka seng, ka ngeit ha ka jingong ka UDP Nongkrem circle bad ka pdiang ia u, hynrei kumba ka paw ka long ba u Bah Shylla u dang dei uba rim hi bad um pat dei u Shylla ba thymmai.
“U la mih na ka party nga kmen”, la ong u Dr Donkupar Roy, uba la ju iakynduh teng bad u Bah Shylla hapoh iing dorbar ha u snem 1988 bad u la shah mait kyrteng ha u lamphang dorbar, u Bah PR Kyndiah tang na ka kot ba la ujor da u Bah Shylla ban pynkhyllem ia ka sorkar u BB Lyngdoh. Hynrei kham hadien ki MLA ba shah mait kyrteng, ki la iakhun ha Supreme Court bad ki la jop biang ia ka jinglong MLA.
U Dr Donkupar u bym kwah ban kren bun halor u Bah Shylla, u la ong ruh ba namar ba u Bah Shylla u la kam ba um dei shuh u Shylla kum mynshwa, ka UDP ha ka elekshon MDC shiteng samoi ka la ai tiket ia u na Nongkrem lyngba ka jingpynskhem ka UDP Nongkrem circle hynrei phewse u la kylla biang.
U Bah Shylla uba don na UDP u la mih noh na ka party hadien ba u la leit ban kyrshan mynta ia ka PDF ba ialam da u Bah PN Syiem kum u CEM ha KHADC . Ha ka jingshisha, u Bah Shylla u dei uba ther jur ia ka EC ba ialam jong u Bah Pynshngain shwa ba un leit kyrshan kylla ia ka.