Dang iakren ka BJP ia ki MLA ban kyrshan ia U Kovind

Shillong, 05 Naitung:
U President ka BJP u Bah Shibun Lyngdoh u la ong ba ka BJP ka dang iakren mynta bad kiba bun ki MLA ban ai ka jingkyrshan ia u kyrtong President ka NDA u Ram Nath Kovind. Katkum ka jingtip, u Kovind un wan sha kane ka jylla ha ka 7 tarik ban ialap elekshon ia ki MLA.
Haba iakren mynta ka sngi, u Bah Shibun u la ong ba kumba haduh mynta ki la don ki MLA kiba la kular ban ai jingkyrshan ia u kyrtong ka NDA bad kiba la sngew thikna ki la palat ia ka 12 ngut eiei haduh mynta.
“Ka jingiakren ka dang iaid mynta bad ki MLA kynthup kiba don ha ka liang ka sorkar ruh ban ai ka jingkyrshan ia u kyrtong ka NDA”, la ong u Bah Shibun.
U President ka BJP u la ong ruh ba kan don ka jingialang lashai bad ki MLA kiba la don ka jingsngew ban ai jingkyrshan ia u kyrtong ba pynieng ka NDA hynrei um pat kwah ban iathuh bniah halor kane.
Mynta ka sngi ka kyrtong ka UPA ka Meira Kumar ka la dep ban kren ha ki MLA shi bynta na ka jingialap jongka ban pan jingyrshan na ka bynta kane ka elekshon President ban long ha ka 17 tarik. Hynrei ha kane ka sngi, kiwei ki party bun kim wan kum ka NCP, NPP, HSPDP lait noh tang ka UDP kaba leit ban sngap hynrei ka bym pat treh ban kyrshan ia ka.