Ngan iakhun President da ka ideology, ong ka Meira

Shillong, 05 Naitung:
Ka Meira Kumar, ka kyrtong president ka ri ka UPA kaba don 17 tylli ki seng, ka la wan ha ka nongbah mynta ka sngi ha kaba ka la pynlong ia ka jingialap elekshon ha annexed hall ka iing dorbar ka jylla.
Haba kren sha ki MLA ha kane ka jingialang, ka Meira ka la ong ba ka shim ia kane ka rai ban mih madan ban iakhun ia kane ka elekshon ka long namar ba ka kwah ban pynieng ia ka nongrim ne ka ideology pyrshah ia ka sorkar NDA kaba la pyrshang ban set kak ia ka sur jong ki paidbah ka ri.
“Nga ieng ha ka nongrim ban iakhun ia kane elekshon bad nga kyrmen ba ka sur ba napoh ka jingiatiplem hapdeng ki MLA,MP kan treikam ban kyrshan ia nga”, la ong ka Meira.
Ha kane ka jingialang, bun ki MLA ba kham paw ka Congress kiba jah kum U Bah Prestone Tynsong, Kong Roshan Warjri, Kong Ampareen Lyngdoh kim shym la wan poi, hynrei ki MLA na kiwei ki seng, kiba wan sngap ki long na ka UDP ba kynthup u President u Dr Donkupar Roy, u Dr Jemino Mawthoh bad u Bah TW Chyne.
“Ha ka jingialang hapoh ka jingialam ka President ka AICC ka Sonia Gandhi ki 17 tylli ki seng sain pyrthei ki la rai lang ban pynieng ia nga ha ka nongrim ka idoloji. Ka dei ka sien ba nyngkong ba ka elekshon President ha ka ri la ialeh da ka nongrim ka idoloji”, ka la ong.
Ka la ther ia ka sorkar NDA ba ialam da u Narendra Modi da kaba kynnoh ba ka jinglait luit jong ki niam, ka jinglait luit jong ka bam, ka la shah khang, ha kaba ka sorkar ka la hukum ia ki briew iano ban mane, iano ban bam.
“Shano shano ba nga leit ka la don ka sur kaba sngew tynnad bad kane ka dei ka jingialap ba nyngkong jong nga ha kane ka dong mihngi”, ka la ong.
Ia ka Meira la synrang lang u CP Joshi u genl secretary uba peit ia ka Meghalaya, u Pawan Bansal uba long myntri sorkar barim ka UPA, nalor u Myntri Rangbah u Dr Mukul Sangma, u President ka MPCC u Bah DD Lapang bad kiwei ki MLA ka Congress.
Katkum ka sur mynta u kyrtong ka NDA u Ram Nath Kovind, u la don ha ka thong ban rah suk ia ka jingjop lada kam don ka jingiashet kylla hapdeng ki MLA bad MP.