“U myntri rangbah ha Meghalaya un dei na ka seng BJP”

Shillong, 5 Naitung:
U National Joint Secretary ka BJP u B.L Santhosh u la ong ba ka BJP ka la ioh ban synshar ha ki saw tylli ki jylla ka thaiñ shatei Lam Mihngi kata ka Assam, ka Arunachal Pradesh, Manipur bad Nagaland bad mynta ki sngi ki por ki la hajan eh ba katei ka seng kan ioh synshar sa ha ka jylla Meghalaya. “Ia ka Assam, Arunachal Pradesh, Manipur bad Nagaland ngi la ioh, ka por ba ngin synshar ia ka Meghalaya ka la hajan eh” ong u B.L Santhosh haba kren ha ka jingialang jong ka BJP kaba la long mynta ka sngi ha Mawlong, Shella konstitwensi.
Utei u heh BJP u la ong ba kumba ka long mynta ka BJP ka don 13 ngut ki myntri rangbah ha ki 13 tylli ki jylla jong ka ri India bad lada kheiñlang bad kiwei pat ki jylla kiba la synshar da ka kynhun kaba ia tehlok bad ka BJP kata ka NDA ka jingdon ki myntri rangbah ka long haduh 17 ngut, “Ha u 2018 u myntri rangbah ka Meghalaya ruh un dei na ka seng BJP” ong utei u heh BJP uba la wan ban peit pyrman ia ka jinglong jingman katei ka seng ha Shella konstitwensi. U Santhosh u la ioh ban ia kren markhmat mynta ka sngi bad ki nongialam jong ki Unit bapher bapher jong ka BJP Shella Mandal kiba la poi kumha 250 ngut eiei ha katei ka jingialang kaba la long ha Mawlong.
Ha katei ka jingialang la donlang u President rangbah ka BJP ha ka jylla Meghalaya u bah Shibun Lyngdoh, u Vice President bah David Kharsati, u President ka BJP East Khasi Hills District u bah Babul Suting, u bah Jropsing Nongkhlaw Chief Organiser ka Shella Mandal u ban long ruh u kyrtong na katei ka seng ha ka elekshon 2018 na Shella konstitwensi bad kiwei pat ki nongialam jong katei ka seng. U bah Shibun Lyngdoh haba kren ha katei ka jingialang u la ong ba ha ka seng BJP ki don 4 ngut ki General Secretary bad ka kamram jong kitei ki 4 ngut ka dei ban leit sha ki nongbah jong ki jylla bapher bapher ha ka ri India, hynrei nalor kitei u la ong ba ki don pat sa ki Joint Secretary bad ka kamram jong ki Joint Secretary ka long ban rung sha manla ki kyndong kynshrot jong ka jylla kumhba u B.L Santhosh u la wan sha Shella konstitwensi.
Shuwa ka elekshon 2018 u bah Shibun u la ong ba kin don bun ki nongialam jong ka BJP na Delhi ban rung sha ki kyndong kynshrot jong ka jylla ban pynsngewthuh paidbah bad u la ong ruh ba ka kam ka BJP kia mynta hi ka dei ban pynsngewthuh paidbah ia ka jingkordor ka synshar paidbah bad ka vote ka wan pat hadien. Ha katei ka jingialang ki nongialam katei ka seng ki la pynsngew ia kiba bun ki mat halor ka jingiaid lynti jong ka sorkar NDA hapoh ka jingialam jong ka seng BJP kaba la 3 snem kynthih mynta bad ki la kdew ba ka ri ka la lait na ka bamsap hapoh ka jingialam jong ka BJP. U bah Jropsing Nongkhlaw haba kren ha katei ka jingialang u la ong ba ka dei tang ka jingialang jong ki nongialam Unit na ki Polling Booth bapher bapher bad kam dei kaba la khot paidbah satia. La pynlong ia katei ka jingialang ha Indoor Stadium, Mawlong.