Na ka daw iing, poi kyrni dih drok ki thei samla ha ka nongbah

Shillong, 4 Naitung:
Ka la don ka jingnang kiew ki kynthei kiba dih drok ha ka nongbah kiba hapdeng ka rta 15-16 snem, la ong ka nongkren ha ka jingiaid paidbah pyrshah drok ha ka nongbah mynta ka sngi ba pynlong da ka National Health Mission (NHM), Meghalaya and Red FM.
“Ka jingdon ki kynthei kiba dih drok ka la nangkiew ha ka nongbah bad ia kane la pynshisha lyngba ka jingwan rejister ha centre ha Civil Hospital Shillong bad kine ki dei hapdeng ka rta 15-16 snem”, la ong ka kong Phida Dkhar ka nonghikai ia kiba kyrni dih drok.
Ka la ong ba ka daw halor kane kaba pynngop ia ki thei samla ka dei namar ka jingiakynduh jingeh ha iing ha sem jongki bad ka jingshah pynshoi ha ki paralok.
“Ka jingbym don ka jingiasyllok jong ki kmie ki kpa bad ban iashong kai bad la ki khun ban sneng ban kraw ka la long kawei ka daw kaba pynlong ia ki kynthei ban kylla dih drok namar ka jingshah ialam bakla”, la ong ka Kong Dkhar.
Ka la ong ruh ba bunsien ki kmie ki kpa ha kane ka juk kim don por ban iashsongkai ban sneng ia la ki khun bad ki bun kam ban ia beh ia ki kam ki jam ne kiwei ki daw pat.
Ka la iathuh ba kine ki Kynthei ki shah pynbor ha ki Kmie ki kpa ba kin leh bha khamtam ha ka jingpule bad kiwei ki kam wat hapdeng ka jingbym Mon jongki run bad Kane ka la ialam ia ki ban phai noh pynban sha ki kam bym man namar ka jingsuhsat ka jingim.
Namar Kane ka jingbym iasngewthuh jingmut hapdeng ki Kmie bad kpa khamtam ka jingbym Don por ki Kmie ki kpa ban iasyllok ban iaphylliew jingmut bad ki khun ka la pynlong ia ki Khun ban shah ialam bakla.
Kumba long mynta ki don kumba 2000 ngut kiba kyrni drok kiba rejister ha ka nongbah bad kine ki wan shah Sumar man u B’nai ha civil hospital.
Ka Kong Dkhar kala kyntu ia ki kmie ki kpa ba kin sngewthuh ba kin ialam ia ki khun jongki lada kiba iakynduh ia kum kane ka jingeh sha ka jaka kaba la buh ha Civil Hospital, Shillong lane ha Ganesh Das hospital.
Ka NHM hynne ka la pynlong ia ka jingpynshai ia ki jingsniew na u drok ha jaka ieng bos ha Mawlai, bad ka la don ruh ka jingkyntip ha kaba ki briew ki jubab bad kiba dei ka jubab ki ioh khusnam.