“Risain noh Bah Blanding” dawa ka HSPDP Mawthadraishan

Shillong, 03 Naitung:
Ka HSPDP Mawthadraishan Constituency Area Unit ka pynrem bad pyrshah jur ia ka jingleh lyndet bad jingshet shukor jong u Bah Blandingstar Warjri u MDC, ia ka seng, ia ki nongialam ba hakhlieh jong ka seng bad ia ki nongkyrshan ba lui lui kiba la trei shitom met bad mynsiem ban pynjop ia u.
Ha ka kyrwoh ba la pyllait, la ong ba une u MDC u khlem kynjoh ktien wat tang shi kyntien ruh ia ki nongialam bad nongkyrshan jong ka seng, hynrei ula shu jah rngai kumto kumba shah rah ha u ksuid tynjang naduh ka miet 19tarik Jylliew 2017 bad dei tad haduh ka janmiet jong ka 22tarik Jylliew 2017 hadien ba la wai ka dorbar jong ka KHADC ba u sa wan mihpaw pyrthei ban kren ha ki lad pathai khubor bad ula pynbna artad ba shispah na ka shispah ula rai ban leit pyniasoh bad ai jingkyrshan ia ka PDF, kaba long pyrshah ia ka rai jong ka seng, kaba la dep weng noh ia ka jingkyrshan na katei ka kynhun.
Ka seng bad ki paidbah nongkyrshan ki la jied ia u ban leit shong ha iing dorbar ban iasaid ia ki jingeh jong ka constituency, ka ri bad ka jaidbynriew bad la ong “Ngi khlem jied ia u ba un leit shong riehtngen ha ki pyntha phlang ba jyrngam jong ka jingdum”.
Ka jingleh jong u Bah Blandingstar Warjri MDC, ka dei ka jingleh kaba la pynsah umdum ha kaba ka HSPDP Mawthadraishan ka pynrem jur namar tang hapoh ki 6 bnai ba u la jop, u la pynkhein ia la ka kular ba u la khlei ban ieng skhem halor ki nongrim jong ka seng kaba la pynjop ia u. Ka jingleh jong u ka dei ruh ka jingiuhroit bad ka jingthombor ia ka hok jong ki nongkyrshan ba lui lui jong ka party kiba la pynjop don burom ia u ha ka bye election MDC kaba dang shu dep shen ha u bnai December 2016.
Ka HSPDP Mawthadraishan, ka dawa ia u Bah Blandingstar Warjri MDC ba u dei ban resain noh mardor na ka kam MDC ba u bat bad um don hok shuh ba un dang bteng ia katei ka kam namar dei ka HSPDP kaba la pynjop ia u; ym dei ba u la jop hi.
Ha ka juh ka por ka HSPDP Mawthadraishan Constituency Area Unit ka kyrpad ia baroh ki nongialam jong ki Primary Unit bad baroh ki nongkyrshan jong ka seng kiba hap hapoh ka Mawthadraishan constituency ba kim dei shuh ban shah ialam bakla ha utei u MDC uba la shet shukor bad phet noh na ka party. Ka party ka long kaba la pynkhreh ban iakhun bad ban ioh ia ka jingjop ba don burom ha ka election MLA 2018 arshah ban ia kaba ngi la pynjop ia u Bah Blandingstar Warjri uba la phet noh na ka seng.