Ioh borti thieh niut ka Lapalang, kaba shabar ka Municipal

Shillong, 03 Naitung:
U MLA ka Nongthymmai u Dr Jemino Mawthoh u la sam borti ADB (Asian Development Bank) na ka bynta ban theh niut ha ka shnong Lapalang ha kane ka sngi. Ha ka thain Nongthymmai ki don 11 tylli ki shnong kiba la iasoi bad ka tnad pynroi sor ka sorkar ban pyntreikam ia kane ka projek pynkhuid shabar ka jaka ka Municipal.
Ha kane ka sngi, la don lang u Rangbah Shnong, u secretary, Rangbah dong bad kiwei ha kaba da ki spah tylli ki longiing ki la wan ban shimti ia u borti.
Ka shnong Lapalang ka dei kawei napdeng ki 11 tylli ki shnong kiba hap shabar ka Shillong Municipal Board (SMB) kiba la mynjur ban wan kit niut da ka kali Municipal.
Kine ki shnong ki la iasoi ia ka jingiateh bad ka sorkar ba kan pyntreikam ia ka skhim pynkhuid ia ka sor kaba la bei pisa da ka Asian Development Bank (ADB).
Ki shnong kiba la iasoi ia ka Memorandum of Understanding (MOU) ki long ka Mawlai Mawiong, Lapalang, Lawjynriew, Lumsohphoh, Nongmensong, RR Colony, Rynjah, Umpling bad na ka thain Nongthymmai.
Katkum ka jingong ka sorkar ka jingpdiang ban wan kit niut ki kali Municipal, kam mut ba kan tuklar ban pynrung ia ki ha ka jaka ka Municipal hynrei kin neh haka jingpeit ka district council ha ka Scheduled Area.
la ong ba kane ka skhim pynkhuid ia ka sor ka long ban pyniakhlad ia ki jaboh ba pyut bad ki bym pyut ha kaba ka ADB ka la bei pisa na ka bynta kane.