5ngut, ki la iap shah ot ha Smit, ym pat ioh kem iano iano

Shillong, 19 Nailar:
“Wat ju shim ia ka ain ha la ka jong ka kti” ka dei kaba la ju kren borabor. Sa kawei pat ka kyntien, ka ong shuh shuh “Ym don uba long halor ka ain”.
Hynrei, haba U Rupang, u iohsngew ia ka jingiakren dorbar ha ka sngi saitjain ba ladep ha Smit, u kum pyrkhat, la ka long ne em kaba shisha, ba ym don uba long halor ka ain.
Haba sngap ia ka jingiakren dorbar ha katei ka sngi, la sngewthuh ba ki la don kumba 4,5 ngut ki riew rangbah, kiba la shah pyniap bad shah trud tari, ha ki bun snem ba ladep, ha katei ka shnong Smit, hynrei, kaba pynlyng ngoh ia ki nongkren dor bar, ka long ba haduh mynta ym don satia, uba shah kem ne uba shah pynsaja, wat tang uwei ruh, na bynta kitei ki jingjia.
Don na ki nongkren , kiba jaw ummat, ha katei ka sngi shong dorbar, haba ki poi kynmaw biang ia kaei kaba la jia ha la iing la jing bad la kumba ong kawei ka longkmie “Tang kiba thar u shiah, ki sngewthuh ia ka jingpang”.
U bah Easter Kharumnuid, uwei na ki riew rangbah, haba kren ha ka dorbar, u iathuh ba u para jongu, ula shah pyniap ha katei ka dur, da kaba shah law lyngkhuid bad shah trud tari, la slem bha, hynrei, um tip, iano ba la kem ne la pynsaja.
I Kong BL Kharumnuid, haba kren, i iathuh ba na ka iing jongi, arngut ki la shah pyniap ha katei ka dur bad u para kynsi u dang shah pyniap dang 4snem mynta.
U Maharar Mawroh, u iathuh ba u paduh jongu, u dang shah pyniap ha ka pomblang ba ladep, kaba long ha u bnai Naiwieng ba ladep.
Kawei ka longkmie, ka kong Aisidora Kharkongngor, kaba dei ka President Seng Longkmie Umlynthong, ka iathuh ba dang lai snem mynshwa, u lok jongka, ula shah pyniap ha katei hi ka rukom.
Na jan baroh ki jingjia, ba la iathuh da kitei ki riew shem lanot, ha la ka jong ka jong ka longiing, ki kdew, ba kitei kiba shah pyniap, ki shah trud da ka tiar ba nep ia ki met jongki, ki shah law lyngkhuid bad hadien, ba la pyniap, ki sa bret shapoh Um.
La sngewthuh ruh, ba haduh mynta, ym shym la ioh kem satia iano iano ruh, ia kiba donkti ha katei ka kam pyniap ia kitei ki 5ngut ki nongshong shnong jong ka Smit.