Thoh ki Rangbah Shnong sha u Kiren Rijiju, lyngba u bah Hek

Shillong, 29 Jylliew:
Ka Synjuk Ki Nongsynshar Shnong Ka Bri U Hynniewtrep (SNSBH) ka la thoh sha u myntri khynnah ka tnad pohing ka sorkar India lyngba u bah A.L Hek ban pynpaw ia ka jingpynrem jong ki namar ka jingshah beh bad shah kren tohmet ka longkmie Khasi ka kong Tailin Lyngdoh ha ki nongpyniaid jong ka Delhi Golf Club. Haba pynpaw ia ka jingai khublei namarba u la shimkhia ia katei ka kam ka Synjuk ka la dawa ruh ba ki nongpyniaid katei ka Club ki dei ban pan map na ka kong Tailin bad na ki paidbah ka jylla Meghalaya, kane ka long katkum ka kyrwoh na u General Secretary u bah R.L Blah.
U Pastor PBM Basaiawmoit ha ka jingthoh sha u myntri kam pohing ka sorkar pdeng u la ong ba katei ka jingleh jong u Manager ka Delhi Gulf Club u Ajit Pal bad ka nongtrei ka Club ka Sumita Thakur ka la tyngkhuh bad ki Arts. 14, 15, 17 jogn ka Riti synshar ka ri India bad kumjuh ka Scheduled Castes and The Scheduled Tribes (Prevention of Atrocities) Act, 1989 kaba la dep pynbeit thymmai Scheduled Tribes (Prevention of Atrocities) Amendment Act, 2015 (1 of 2016) bad Section 341 IPC. U Pastor u la ong ba ka la dei ka por ba ki Club bad ki hotel ha ka ri ki dei ban buh da ka kyndon ba baroh kiba trei hapoh ki Clib ne Hotel ki dei ban shah hikai kumno ban tip ia ka rukom im rukom long jong baroh ki jaitbynriew ha ka ri India khamtam ia ki jaitbynriew rit paid ha ka thain shatei Lam mihngi.