Ka ain pyrkhing shalan masi ha ka jylla kam treikam

Shillong, 28 Jylliew:
Ka ain pyrkhing shalan ia ki masi ha kane ka jylla kam pat treikam satia namar ba ka sorkar jylla kam kwah ban pyntreikam ia kane namar ba ka dang ap ia ka rai na ka sorkar pdeng halor ka jingthoh ba la rai da ka iing dorbar thawaiñ.
Katkum ka jingiakren bad u Commissioner bad Secretary ka tnad ri jingri ka sorkar jylla u P Sampat Kumar, u la ong ba haduh mynta ka sorkar jylla kam pat treh ban pyntreikam ia kane ka rule ba la phah da ka tnad Forest and Environment ka sorkar India katkum ka Prevention of Cruelty to Animals (Regulation of Livestock Markets) 2017.
“Ka iing dorbar Meghalaya ka la pass ia ka rai ban pyrshah ia kane ka rule ba la shna da ka tnad ka sorkar pdeng bad kawei pat kane ka kam ka dang sahteng ha ka Madras High Court ha kaba la don kiba ujor PIL pyrshah”, la ong u Kumar.
U la ong ba kane ka ain ka ktah ia ka rukom im bad ka rukom bam jong ki briew kane ka jylla bad ka long ka bym iahap bad dei na kata ka daw, ba ka sorkar jylla ka la pynpaw ia ka jingpyrshah ha kaba ka la phah ruh ia ka jingthoh sha ka sorkar pdeng.
U la ong ba haduh mynta ym pat ioh jubab eiei na ka sorkar pdeng halor kane hynrei u kren shai ba kane ka ain pyrkhing shalan bad bam doh masi ha kane ka jylla ym pyntreikam satia namar ba ka sorkar ka iaid katkum ka jingsngew jong ki paidbah.