Bun ki Bill ka KHADC ki sop bthuh lut ha Secretariat, ong u Bah Shylla

Shillong, 27 Jylliew:
U Chief Executive Member (CEM) barim ka KHADC u Bah Hispreachingson Shylla u la ong ba ki Bill ba la pass da ka Autonomous District Councils (ADCs) ka dei ban iaryngkat bad ka bor jong ka iing dorbar thawain ka jylla khnang ba kim nym iaid shuh na ka sorkar jylla, kaba ju bat kai bun ia ki Bill haduh ba ki sop bthuh lut.
Haba kren mynta ka sngi ha ka jingiapyni jutang ha ka sngi rakhe sngi District Council ha Shillong, u Bah Shylla u la ong ba ka la donkam ban pynkylla ia ka bynta jong ka riti synshar ka ri ban pynthikna ba ki Bill ba pass ka Council ka dei ban iaryngkat bad ka bill ba pass da ka sorkar jylla.
“Ka long kaba sngewsih ban iohi ba ka KHADC watla ka la dei ka met kaba laitluid hynrei ka dang shah bishar ha ka tnad sorkar”, la ong u Bah Shylla uba dei ruh u MDC na Nongkrem.
U Bah Shylla u la ai jingmut ba ka donkam ban weng noh ia ka Paragraph 3 ka Sixth Scheduled ka riti synshar ka ri kaba ai bor ia ki district council ban thaw ain.
“Ka don ka lain ha kane ka paragraph kaba ong ba baroh ki Bill ba pass da ka District Council kin leit sha u Lat bad haduh ba la pdiang ma u, kan nym lah ban treikam. Namar kane ka lain, u Lat u don ka jinglaitluid ban bat kai ia ka Bill khlem aid aw eiei”, la ong u Bah Shylla.
U la ong ba ka jingiapynlut por ki MDC ban iakren ban thaw ain ka la long sepei lut khait namar ba kaba kut ka sah ha ka mon jong u Lat ka jylla.
Hynrei u la ong ba lada ka Bill ka ioh ia ka kyrdan kum ka iing dorbar ka jylla, u Lat um lah ban kyntait hadien ba la phah biang sha u bad u hap ban pdiang.
U la ong ba ki Bill ki district council ki hap ban iaid lyngba ka tnad ka District Councils Affairs ka sorkar jylla shwa ban leit sha u Lat.
U la ong ba ka bill kaba pass ka KHADC ha ka por ba long CEM u Bah Hoping Stone Lyngdoh ha u snem 1980 ka dang sahteng ha miej ka sorkar jylla.
U la ong ba kaba thamula ka long ba ka Council haduh mynta kam tip ia kane bad kine ki bill ki la shu sop bthuh ha Secretariat.
U la ong ba kawei kaba jop ka Council ha kine ki 65 snem, ka dei tang ka jingioh ia ka ain thung rangbah shnong ka Appointment and Succession of Chiefs and Headmen Act, 1959.