Mar ia thmu ban weng ia ka MD, rah plakad ki nongtrei ka MTC

Shillong, 27 Jylliew:
Mynta ka sngi ki nongtrei ka Meghalaya Transport Corporation hapoh ka shatri jong ka Meghalaya Transport Corporation Workers Union (MTCWU) ki la pynlong ia ka jingsangeh treikam da kaba iamih baroh ban rah plakad, mar ia ioh jingtip ba ka sorkar ka la weng noh ia ka Managing Director ka Kong Aldealyne Nikhla.
Kine ki nongtrei ki la pynlong ia ka jingiakhih ba kynsan hakhmat ka ophis jongka ha ka por shiteng sngi kaba don ha Khyndai Lad kum ka dak ka jingpyrshah ia ka jingleh jong ka sorkar ban pynkynriah kam ia ka MD.
Katkum ka jingtip ka sorkar jylla ka la weng noh ia ka Kong Nikhla na ka kam Managing Director bad ka la thung bujli da u Joint Secretary PM Sangma ha jaka jongka.
Ban pynjur ia kane ka jingdawa ban pynneh ia ka Kong Nikhla, ki nongtrei ki la rai ruh ban pynlong ia ka jingsangeh pyniaid ia ki skul bos naduh lashai haduh ban pynbna da kumwei pat.
U President ka Union u Bah K Rumnong haba kren sha ki nongthoh khubor u la ong ba ka daw ka jingdawa jongki ban pynneh ia ka Kong Nikhla kum ka MD ka long namar ba ka la long kaba trei shitom bha ha kaba bun ki kam ba ka Corporation ka la lah ban leh tang ha I por ba lyngkot. U la ong ba ka MD ka dei kaba trei shisha ban pynim ia ka Corporation bad lada ka sorkar ka leh kumne ka la pynduh mynsiem ia ki nongtrei bad ka dei ban pynneh shwa ia ka.
U la ong ba halor kane, ka Union ka la phah jingthoh sha ka sorkar kynthup sha u Myntri Rangbah bad u Chief Secretary ban pynneh shwa ia ka Kong Nikhla.
U la ong ba ka jingsangeh trei mynta ka sngi ka long hadien ba u Myntri Rangbah bad u Chief Secretary kim shym la khot iakren watla ki la ap slem ia ki.
Ka Kong Nikhla ka dang shimti ia kane ka kam dang khyndai bnai mynta hynrei la shah pynkynriah kam noh.
Ha kane ka jingsangeh treikam kynsan mynta ka sngi, ki nongtrei ki la deng lama iong ban pynpaw pyrshah ia ka jingleh ka sorkar.
Katkum ka jingong u Bah Rumnong, hapoh ka jingpeit ka Kong Nikhla, wat tang 9 bnai ka la wanrah ia jingiaid beit ha ki kam ki jam la ka long ha ka pisa ka pilain.Ka kong Nikhla ka la wan shim ti ia ka kam Managing director ha u bnai Nailur 2016.