Mynjur u Lat, ka ain Anti Infiltration

Shillong, 19 Nailar:
Ha ka jingthmu ban teh lakam ia ka jingwan rung beain jong ki briew ha kane ka jylla u Lat ka jylla u KK Paul u la mynjur ia ka jingtyrwa jong ka sorkar ban buh noh da ka Anti Infiltration.
Kane ka jingpynmih jong ka sorkar ia ka jingpynbna ka long sa shitaiew shwa ba ki sengbhalang kin leit iakren ban dawa ban pyntreikam noh ia ka Inner Line Permit (ILP).
Ha ka kywoh khubor ba la pyllait da u Commissioner & Secretary jong ka Home department ka jylla Meghalaya la ong ba ia kane ka tnad un khlieh da u Ophisar uba bat ha ka kydan Additional Director General of Police (Addl.DGP) ne Inspector General of Police(IGP) bad ka Headquarter kan don ha Shillong.
Lah ban kdew ba ka sorkar jylla ka la pynbna ba mynshem snem kala ong ba ka thaw noh da ka Directorate ba kyrpang ia ka Anti Infiltration khnang ban pynkhlain ia ka rukom treikam ban khang lad ia ki briew kiba wan rung beain ha kane ka jylla.
Kane ka tnad Infiltration ka dei kawei kaba shah kynthah jur ha ki seng bapher bapher namar ba kam lah ban pyntreikam bha ha kine ki snem ba la dep. Kham mynshwa na ka liang ka UDP Youth Wing ka la kynthah jur ia ka jingtreikam jong ki Infiltration check gate kiba don ha Byrnihat jong ka Ri Bhoi District bad ha ka thain Umkiang-Ratachera ka East Jaintia Hills District.
Ka UDP ka la ong ba ki Infiltration check gate ki long tang ki dukan die sha namar ba kim ju kem ia ki briew kiba wan rung beain sha kane ka jylla.
Kumjuh ruh na ki sengbhalang bapher bapher ki ju takrain ia kane ka tnad namar man ka por ki ju lap ia ki briew ba wan ban rung beain ha kane ka jylla hynrei kim ju leh eiei.