Ther kuli ki SF-10 bad ka GNLA, kyllon iap uwei, lait phet U Sohan

Shillong,27 Jylliew:
Kam dei shuh ka sien ba nyngkong, hynrei ka la jia ruh mynta ka kynti ba u Commander In Chief ka GNLA u Sohan D Shira u la lait im biang na ki kuli jong ki pulit. Mynta ka sngi ki pulit ki la leit khynra ia ka ktem jong ka GNLA kaba ki la ioh jingtip thikna ba u Sohan ruh u don hangtei ha ka jaka kaba don hajan ka shnong Rongsu ha South Garo Hills District.
Katei ka jingleit khynra ka la jia ha ka por 6 baje mynstep ha ki thaiñ ba hap ha Siju. U SP ka SGH u Abraham T Sangma u la iathuh ba katba ki pulit ki khynra ha ki thaiñ Chitmang Hills bad Rongsu kynsan kynsan ka la don ka jingther kuli na ktem ka GNLA bad ha katei ka jingjia ka la mih ka jingiather kuli mar kylliang kaba la neh kumba 15 minit eiei.
Ki pulit ki la ong ba ki la don kumba 20 ngut ki GNLA ha katei ka ktem kaba la donlang u Sohan, hadien ba la sangeh ka jingiasiat u SP u la iathuh ba ki pulit ki la leit ban peit ha katei ka ktem bad ki la lap ia ka metiap jong u nongpahara ba ju don ha syndah u Sohan uba la tip kyrteng kum u Ading Ch Marak uba la ju tip ruh kum u Lukseng Ch Marak.
Na syndah katei ka metiap ki pulit ki la lap ruh ia ki kot ki sla jong ka GNLA. Ki pulit ki la lap ruh ia ki kuli AK 56, ki ID jong ka GNLA, ki lama GNLA, ka Laptop bad u Charger, ki shithi dawa pisa bad kiwei pat ki tiar. U SP u la ong ba u Sohan ryngkat kiwei pat ki dkhot ka GNLA ki la ioh phet krad noh namarba mynta ka step ka jur slap bha ha katei ka jaka kaba rben bha ki khlaw.