“Maramot surok” mih 2hajar ngut na ka Balang Rymbai

Jowai, 27 Jylliew:
Kum ka jingia tynrong lem halor ka jingeh ba ki paidbah ki ia kynduh ha ka leit ka wan na ka jingsniew jong ka surok, ka balang Presbyterian Rymbai ryngkat ka jingiatreilang bad ka Shnong hi baroh kawei mynta ka sngi ki la ia mih paidbah palat 2000 ngut ban maramot ia ka surok naduh Rymbai haduh Ladrymbai kaba jngai kumba 5 kilomiter.
Kum ki khun jong ka balang da ka mynsiem jong ka jingiatrei lang ban suk ki paidbah ha ka leit ka wan ki la ia shim bynta shitrhem ban pyndap ia ki thliew ki syar kiba don ha shi lynter ka surok ban pynbha ia ki khohruh khohram katkum ka jingkotbor ryngkat ka jingai mynsiem lem ki Pastor ki tymmen basan bad ki rangbah ka balang.
Haba kren bad ki lad pathai khubor, u Pastor SB Lyngdoh uba peit ia ka balang Rymbai bad U Tbn. H.M.Thoo, ki la iathuh ba kane ka dei ka sien kaba ar ba ka Balang ka la mih paidbah ban maramot ia katei ka surok kata ha ka snem 2001 bad kane ka sien.
Ha kane ka kynti, ka balang hadien ba ka la iohi ia ka jingma ia ka leit ka wan ki paidbah kam banse ban shim ia kane ka sienjam ban mih paidbah, namar ka sngewkhia halor ka jingeh ba ki paidbah khamtam ki khynnah skul ki shem jingeh bha ha katei ka surok.
Naka liang jongka balang ka ai khublei kyrpang ia ka jingiadonlang jong ki pastor kiba kynthup ia u Rev.A Lyngdoh, Rev.C Thoo bad u Rev. D.H Malang lem bad ki tymmen basan jong ka balang kumjuh ruh ia u ma J.R Pyrtuh MDC Bataw Lakadong, ia ka kong Violet Lyngdoh MDC Rymbai Khliehriat bad ruh ia u Daloi jong ka elaka Rymbai u ma Elious Swer.