“Ha u 2018 ngan wan phai kum u MLA ka NPP”

Shillong, 26 Jylliew:
Haba ia kren bad katto katne ngut ki nong thohkhubor ki nongkyr shan ba kham hakhmat jong u Ma Ngaitlang Dhar, MLA ka Congress na Umroi konstitwensi ki la iathuh ba ha kine ki khyndiat sngi u Ma Ngaitlang u la pynbna ha ki ba ha u 2018 un ia khun na ka seng NPP bad ki la ong ba u la kren ha ki ba ha u 2018 un wan phai biang sha Umroi ym shuh kum u MLA ka Congress hynrei kum ka MLA ka NPP. Kitei ki nongkyrshan u Ma Ngaitlang ki la iathuh ba ki ruh mynta ki la pynkhreh ban rung ialade hapoh ka seng NPP hynrei ki ap sa tang ka por ba u MLA jong ki un risaiñ noh na ka seng Congress. Katkum ka jing kren jong ki-ki la ong ba ym dei tang u ma Ngait lang ban leit NPP hynrei kin dang don shuh sa kiwei pat ki MLA Congress.
Shuh shuh ki la ong ba ka jingpynkhreh u ma Ngaitlang ban ia khun na ka seng NPP na Umroi kam dei tang kaba u shu kren sop sop ha ki nongialam ba hakhmat hynrei ka dei kaba la dep ban rung thliew ing briew ban leit pynsngew sha ki paidbah nongkyrshan jong u. Ban pynthikna shuh shuh ia katei ka khubor ki la iathuh ba ki don ruh ki nongialam sengbhalang kiba kyrshan ia u ma Ngaitlang kum na ka seng RBYF ki ban pyniasoh noh shen ialade sha ka NPP bad uwei na ki, u dei u General Secretary katei ka seng u bah Augus Sten na ka thaiñ Umroi. Lah ban pynkynmaw ba ha u bnai ba la dep u ma Ngaitlang u la leit ban ialap paidbah sha Jirang konstitwensi na ka bynta u nongialam barim ka RBYF u bah Sosthenus Sohtun bad ban pynbna ruh ia u kum u kyrtong jong ka seng NPP na katei ka konstitwensi ha u 2018.