Ba shah wiang ding ka IB, julor ar ki jingthiah ha Umsiang

Nongpoh, 23 Jylliew:
Ki runar kiba ym lah satia ban ithuh dur khmat, mynta ka step ki la thmu ban wiang ding ia kawei ka IB jong ka tnat PWD kaba don ha Umsiang khappud bad ka Assam, hynrei hadien ba u Chowkidar u la lap ha ka por kaba biang ban pynlip noh ia katei ka ding.
Ka tyllong khubor ia kaba la ioh ban lum jingtip na ki ophisar ka tnat PWD ha Ri Bhoi, la ong ba kane ka jingjia ka la jia mynta ka step ha ka por 4.30 baje ei ei mynstep bad ha katei ka jingthmu thang dusmon da ki runar ka la wanrah ia ka jingjulor ia ki ar tylli ki jingthiah kiba don ha katei ka IB ka PWD.
Ki ophisar ka PWD na Mawhati Sub Division, tang mar ia ioh jingtip halor katei ka jingjia, ki la hiar mardor sha katei ka IB kaba don ha Umsiang ban jurip halor katei ka jingshah wiang ding, ha kaba ki la lap ba ka don ka jingjulor ia ia ar tylli ki jingthiah.
Haba iadei bad katei ka jingthmu thang dusmon da ki runar ia katei ka IB, na ka liang ki Ophisar ka PWD, ki la dep ban pyntip sha ki bor Pulit ha Umsiang Police Outpost halor kane ka jingjia bad la dep ruh ban ujor da ka Ejehar sha ki Pulit ba kin pynlong ia ka jingtohkit na ka bynta ban ioh kem ia kito ki runar kiba la donkti ha katei ka kam.
Halor kane ka jingjia, na ka liang ki pulit ka Ri Bhoi ki dang pynlong ia ka jingtohkit bad ban thwet jur ia ki runar kiba la donkti ban wiang ding ia katei ka IB PWD ha Umsiang.