Um Mawphlang kaba khuid, na Sawmer shiteng kaba Lati

Shillong, 23 Jylliew:
Namar ka jingujor jong kiba bun ki paidbah ka sor Shillong ia ka jingjaboh ka um dih kaba wan na ka tyllong um jong ka tnad PHE ha ka 21 tarik mynta u bnai ka State Development Reforms Commission (SDRC) ka la leit ban jurip ia ka Dam jong ka GSWSS kaba don ha Mawphlang, ka la leit jurip ruh ia ki jaka pynlang um kaba don ha Mawphlang bad kumjuh ruh kaba don ha 4 mer shiteng, Upper Shillong.
La shim ia ki um na kitei ki jaka pynlang um ba phah Test bad ia ka ripod la ai sha katei ka Commission, hynrei katkum ka ripod ka pyni ba ka um kaba shim na ka jaka pynlang um kaba don ha Mawphlang ka khuid bad ka long ban dih katba ka um kaba la shim na 4 mer shiteng ka dei kaba lati hynrei la pynpoi sha ki jaka sam um kiba bun ha nongbah Shillong. Ka tnad PHE ka la ai daw ba katei ka jingjaboh ka um ka dei namar ka jingrim palat ki paip um bad ki don ki jaka ba pei thliew. U Co-Chairman, SDRC, u Sengman R. Marak, Ex-MLA bad Co-Chairman, SDRC, u Suraj Prakash Thapa, Shri Vijay Raj, Vice-Chairman, SDRC bad ka Dr. Fenella Lyngdoh Nonglait, Ex-Officio Member, SDRC ki la leit sha katei ka jingjurip bad la bthah ia ka sorkar ban pynithuh ia ki jaka sorkar khnang ban ioh tei jaka pynlang um thymmai ha Upper Shillong bad na katei ka jaka yn sam sha ki paidbah. La lap ruh ba ki paid kiba la buh ha ka bynta ba nyngkong jong ka GSWSS ki dei kiba la 30 snem mynshuwa. La bthah ba dei ban tei ia ka Dam rit ban tan bording ilektrik ha Mawphlang.