U synsar 30 tyngka, u phan tang 10 tyngka, ong ki nongrep

Shillong, 21 Jylliew:
Ki nongrep na ka thain Jongksha, ki la sngew duh mynsiem ia ka jingshah ban bein bad jinghiar dor ki mar rep mar riang hynrei ka sorkar pat kam shym la sngap ne iohi eiei ia ki.
Mynta ka sngi, ki nongrep na ka shnong Jongksha bad Umsning kiba hap ha Mawkynrew Block, ki la kren sha ki la ong ba ki la hap ban kren sha ki lad pathai khubor hadien ba ka sorkar kam patiaw ne iohi eiei ia ki jingeh jongki kaba la suhsat.
Haba kren mynta ka sngi, u Sordar ka Jongksha u Bah O Kharsohnoh u la ong ba ka dor jong u synsar mynta ka long tang T.30 shi kilo katba ka bai pynlut ban rep ka long ym duna ia ka T. 40-50 shi kilo haba khein kyllum. U la ong ruh ba u phan ruh uba die ha iew tang 8-10 tyngka, ka bai pynlut pat ban rep kam duna ia ka T. 15 nalor ka bai thied sboh bad kiwei ki jinglut.
U la ong ba ka sorkar ka la pynduh ia ka sboh dawai da kaba pyrta ban pyndonkam noh da ka sboh mariang, hynrei haduh mynta ym lap sboh mariang ban leit na iew na hat bad kane ka la pynbor ia ki nongrep ban thied blak na iew ia ka sboh dawai.
“Ngi kwah ban pynsngew sha ka sorkar ia ka jingshah khnoit ki nongrep ha ka thain Mawkynrew bad ha kiwei ki jaka’, u la ong bad bynrap, ba ka dor u synsnar ka shong dor 30 tyngka shi kilo hynrei jnglut ka long ym duna ia ka 40 tyngka shi kilo.
“Ka sorkar ka kwah ban pynkylla sha ka jylla sboh mariang, hynrei khlem don eiei kita ki sboh mariang ne organic, bad ki paidbah kim banse ban thied rem biang ia ka sboh dawai. Ka dor dawai sboh kaba rem hynrei ka dor kaba tad ban die”, u la ong.
U la pynpaw ba lada ki nongrep kim rep shuh kaei kaban jia, ki nongrep kin hap ban phet shnong sha sor bad hangta ka jingeh kan nang jur ia ka sorkar.
Ka sorkar ka dei ban peit ia ka dor ki mar rep ba kin nym shah khnoit bad ban map noh na ka jingsiew ram ia ki nongrep kiba la shim.
U la ong ba don ki nongrep kiba la shim ram kumba T.50 hajar kaba ai ki bank ban pyndonkam ha ka rep ka riang, hynrei mynta namar ka jingsniew ka iew ka hat, ka la buh jingeh ia ki nongrep haduh ba ki shem jingeh ban siew ia ka ram bad kaba khem eh shuh ka long ba ka sut ka la nangkiew haba kim lah ban siew ha ka por kaba biang.