Tur ki paidbah ka shnong Mawmuthoh sha ophis ka MeECL

Shillong, 20 Jylliew:
Ki paidbah ka shnong Mawmuthoh mynta ka sngi ki la leit tur sha ophis ka MeECL kaba don ha Lumjingshai ban dawa na ka tnat ba ka dei ban buh biang ia u transformer ha katei ka shnong bad ban bishar biang ia ka jingkiew ka bai thang ding sha bneng sha khyndew. Kine ki nongshnong katei ka shnong kim lah shah shuh ia ka jingleh thurmur jong ka MeECL haduh ba kin ieh ia ki kam ki jam ban wan tur sha kane ka ophis ban wad jingshai ia ki jingeh ba ki iakynduh.
Ki la dawa ba dei ban wanrah noh ia u transformer mardor sha katei ka shnong ban pynmeh noh ia ka ding, namar ba ka ktah ia ki samla pule, ki nongtrei kam.
Ki nongshong shnong ki la iathuh ba ki ju siew beit ia ka bai bor ding man la u bnai ha ka Common Service Centre kaba don ha Smit bad ki la leit rah ruh ia ki rusit ban pynshisha, ki la pynpaw ruh ia ka jinglyngngoh ba wat haba ki la siew hynrei ka bai bor ding pat ka poi haduh 3, 4 bad 5 hajar kaba long palat ban ia kaba ki pyndonkam.
Kane ka la pynlong ia ki nongshong shnong ban sah ha ka umdum. Nalor kata, ka MeCEL ka la phah siew ia kajuh ka bai thang ding jong u bnai ba la siew ruh poi biang ka bai thang ding ha uwei u bnai.
Mynta ka sngi, ki paidbah katei ka shnong kiba ia bun bha, ki la iakynduh ia u Chief Engineer ka MeECL ha kaba u la kular ban peit ia kane ka jingeh jongki.
Ka jingleit jong kitei ki nongshong shnong ka long hadien ba ka MeECL ka la pynduh ding ha katei ka shnong mynta la palat lai taiew bad weng ruh ia u transformer na katei ka shnong. Ia kitei ki nongshong shnong la synran lang ruh da u president ka BJYM, u Bah Egenstar Kurkalang, u rangbah shnong bad ki dkhot ka dorbar shnong.
Na ka liang u Bah Kurkalang u la ong ba ka jingleh jong ka MeECL kam iahap satia, namar la pynduh light ha katei ka shnong kham tam ha kane ka por ba kiba bun ki khynnah skul ki don hapdeng ka jingialeh examin.
U la iathuh ba ka tnat ka la ai daw ba ka jingpynduh ia ka bor ding ka dei namar ba ki nongshong shnong ki khlem siew satia ia ka bai bor ding, u la iathuh ruh ba ha ka jingiakynduh bad u Chief engineer ka MeECL u la dawa ban buh biang ia u transformer ha katei ka shnong bad ban pynpoi biang bording.