Ym biang bor ding sha khappud

Nongpoh, 13 Jylliew:
Ki paidbah nong-shong shnong ba shong ba sah ha ki thain khappud bad ka jylla Assam, ba kynthup ha ka thain Umtyrnga bad thain Tyrso Umtngam Ri Bhoi District, ki la pynpaw ia ka jingsngewkhia kaba jur halor ka jingthuh khah khah ka bording Ilektrik, ha kaba ka la wanrah jingeh shikatdei eh ia ki paidbah bad khamtam eh ia ki khynnah skul kiba dang don hapdeng pynkhreh ia ka exam shiteng snem.
Haba ioh ban iakren bad ki paidbah nongshong shnong na ki thain Umtyrnga, ki la pynpaw ia ka jingsngew khia kaba jur halor kane ka jinglip khah khah ka Bording bad ka jingbym shimkhia da ka tnat MePDCL ban pynbiang bording ha katei ka thain.
Ha kawei pat ka bynta, ki paidbah nongshong shnong ha ki thain Umtngam, ka la pynpaw ia kajuh ka jingsngewkhia ban iohi ia ka jingeh kaba la iakynduh da ki paidbah bad khamtam eh ia ki khynnah skul, tang namar ka jingbym biang ka bording kan wanrah ruh ia ka jingthut ia ki khynnah skul, namar ba ka dang dei ka por ba kin pule kot na ka bynta ka Exam shiteng snem.
Kumta haba iadei bad katei ka jingthuh ka bording ha kitei ki thain, na ka liang ki paidbah nongshong shnong, ki la kyntu ia ka tnat MePDCL ba kan ialeh shitom na ka bynta ban pynbiang bording ha kitei ki ar tylli ki thain, khnang ba ki paidbah kin ym mad shuh ia ki jingeh na ka jinglip khah khah ka bording.