12 tarik ka dorbar kyrpang ban pdiang ia ka GST Bill

Shillong, 05 Jylliew:
Ka sorkar jylla ka la thoh sha u Lat ka jylla ba un khot ia ka dorbar kyrpang ha ka sngi Nyngkong ban iakren bad ban pdiang ia ka ain khajna thymmai kaba ryntih ha ka ri baroh kawei ka Goods and Services Tax (GST) Bill ha kane ka sngi Nyngkong ka 12 tarik Jylliew.
Ia kane la ong u Myntri Rangbah ka jylla u Dr Mukul Sangma mynta ka sngi hadien ba la wai ka jingialang ka kynhun myntri.
Ka sorkar ka hap ban pdiang ia ka GST Bill namar ba ka sorkar pdeng NDA ba ialam da u Narendra Modi, ka la buh por khadduh ban pyntreikam naduh ka 1 tarik Naitung ban wan ha baroh kawei ka ri. “Ngan thoh sha u Lat ka jylla ba un khot ia ka dorbar kyrpang la sngi Nyngkong ka 12 tarik Jylliew”, la ong u Dr Mukul.
Katkum ka jingong u Dr Mukul ka jingpyntreikam ia ka GST ka dei hadien ba la iathir bunsien bad ka sorkar India shwa ban poi sha kane ka rai. “Ka GST ka dei ka atiar ban sahkynmaw ha ka khana lum khajna kaba ryntih ha ka ri”, la ong u Dr Mukul.
Katkum ka jingong u Myntri Rangbah ka GST Council ka la buh thong ba baroh ki jylla ki dei ban pynkiew ia ka jingioh khajna sha ka 14 percent na kaba ka ioh mynta u snem hynrei lada kane ka jingbuh thong ka duna, ka sorkar pdeng lyngba ka GST Council kan sa buria ia kaba duna.
Kane ka GST ka dei kaba la pdiang bad pyntreikam da ka sorkar NDA ba ialam da u Narendra Modi hadien ba ka la lah ban jop ia ka jingiathep vote ha ka ing dorbar parliament ha u snem ba la dep.