Khang ki Pulit ka Assam ban pynpoi bording ha Sabuda

Nongpoh, 01 Jylliew:
Da kaba shimkhia halor ki kam lehdonbor da ki Pulit Battalion ka Assam kiba don ha Sabuda, Ri Bhoi District, kiba la pynsangeh jubor ia ka jingthmu jong ka sorkar Meghalaya ban pynhap ia ki Post Ilektrik ha Sabuda, hynnin ka sngi ki nongia-lam ha Hynniewtrep Youth Council (HYC) Raid Nongtung Circle, ki la phah syndon da ka dorkhas sha u Deputy Commissioner ka Ri Bhoi na ka bynta ban tuklar lem halor katei ka kam lehdonbor da ki pulit ka Assam.
Kum ban shu ong hangne, katei ka skhim ban pynpoi Bording ha Sabuda ka dei kaba la mang kyrpang na ka Sorkar Kmie lyngba ka sorkar jylla bad halor jong katei na ka liang ka shnong ruh ka la dep ban ai ia ka NOC sha ka MEPDCL na ka bynta ban pyntrei naduh u snem 2016, ha kajuh ruh ka por la dep ruh ban ai jingthoh sha ki Bor District ka Ri Bhoi.
Hynrei ka long pat kaba lyngoh, ba hadien ba ka tnat MePDCL mynha ka 29 tarik ka la thmu ban leit pynhap ia kitei ki Post Ilektrik, hynrei ki la shah khang jubor bad phah pynphai noh ia kitei ki Post Ilektrik ha ki Pulit Batallion ka sorkar Assam, ha kaba kane ka jingleh donbor da kitei ki Pulit ka Assam ka la wanrah shisha ia ka jingduhnong kaba khraw ia ki paidbah nongshong shnong ka Sabuda, namar katei ka shnong kaba don ha khappud bad ka Assam kat haduh kine ki sngi kam pat don ia ka Bording Ilektrik.
Haba iadei bad katei ka kam leh donbor da ki Pulit ka Assam, na ka liang u samla Hercules suting President HYC Raidnongtung Circle, u la pynrem jur bad ha kajuh ruh ka por u la ong ba ki kam lehdonbor da ki Pulit ka Assam ha katei ka thain ka ju iai jia na ka por sha ka por, ha kaba bunsien ki Pulit ka Assam ki ju khang lada wan kino kino ki skim pynroi na ka Meghalaya sha katei ka thain khappud.
Namarkata, ka seng hi ka kyntu ia ki briew ka sorkar jylla ba ki dei ban shimkhia ban hiar sha katei thain khnang ban lah ban pynbeit ia ki jingeh halor ki kam pynroi ia kaba la wanrah da ka sorkar Meghalaya, ka por ka seng ka pynrem jur ia ka sorkar jylla namar ka jingbym patiaw ka sorkar halor ki jingud jingnam da ki paidbah halor ka jingeh kaba la iakynduh ha ki thain khappud bad ka Assam, u la bynrap.