Kyntait u Syiem Mylliem ba theh niut na Iewduh ha Motphran

Shillong,1 Jylliew:
U Syiem ka Hima Mylliem u Paiem Ricky Nelson Syiem u la kyntait ia ka jingshah kynnoh ha ka Shillong Municipal Board ba ka jaboh ka Motphran ka dei namar ba wan theh bad bret niut ki briew na Iewduh.
Haba kren sha u nongthoh khubor mynta ka sngi, u Bah Paiem Rickey u la ong, “Kam dei ba pynjaboh na Iewduh, ym don nongsah ha Iewduh, kumno yn wan bret niut”,.
U la ong ruh ba um pat ioh pdiang satia ia kata ka shithi ba phah na ka Shillong Municipality Board ba ka la phah shithi ban ujor sha ka National Green Tribunal (NGT) halor ka jingpynjaboh ia ka Motphran. “Ngam shym la ioh jingtip eiei ia ka shithi ba la phah da ka Municipality”, la ong u Paiem Ricky.
Halor ka jingkhuid ka Iewduh, u Paiem u la ong ba u la pyrshang ban pynlong ia ka kaba khuid hynrei kaba donkam eh ka long ban ai jingshai ia ki paidbah nongiew nonghat ba kin snegwthuh ia ka dor ka jingleh khuid namar ba khlem ka jingiatreilang bad ki, kan long kaba eh ban pynkhuid. Ha kane ka taiew, u CEO ka Shillong Municipality Board u Bah BS Sohliya u la ong ba ka Municipal ka la dep phah jingthoh sha u Syiem ka Hima Mylliem ba u dei ban bthah ia ki nongiew ba kim dei shuh ban wan theh niut ha Motphran bad lada dang iai leh, kam banse ban ujor syndon wat sha ka NGT ba kan leh ia kaba donkam.