Bun ki samla ba wan pule nurse nabar kim biang

Shillong, 01 Jylliew:
Ka jingleit jong ki samla na kane ka jylla ha ka liang ka Nursing ka lah ban don ka jingma ia ki namar ba katkum ka jingtip ba la ioh, bun na kine ki samla kim biang satia ka jingtbit haba ki la pyndep ia ka jingpule jongu nabar.
U nongthoh khubor u la ioh ia ka jingtip kaba thikna, ba bun na kine ki samla khamtam na nongkyndong ki la shah ialam bakla ha ki ejen kiba ialam ban leit pule shabar ha kane ka lain jingpule hynrei kim tip ba ki jaka pule ki long kiba biang ne kiba bym biang.
Katkukm ka jingtip, kine ki samla kiba bun ki dei kito kiba la leit pule shabar jylla kum sha Kerala, Bangalore bad ha sha kiwei ki jaka ha ki jaka pule ba pyniaid ki riew shimet, kiba ka jinglong jongki, kam long kaba thikna hynrei tang ban shu syrnod khlem biang satia ka jinghikai.
Ia kum kane ka jingduna bad ka jingbym biang jongki, namar ba shisien ba ki la wan phai na ka jingpule jongki, hadien ba la pynlut da ki lak, kin hap ban rejister shwa ialade ha ka Meghalaya Nursing Council ba kin ioh ia ka kynja license ba kin lah pat ban aplai ia ki kam lada lait ha kano kano ka jaka sumar ha kane ka jylla.
Hynrei katkum ka thymmei khubor, la iathuh ba bun na kine ki samla kim da don ka jingtip bad ka jingtbit khamtam ha ka praktikal namar ba ban long nurse ka donkam bha ka praktikal ban nang ban sumar ia ki nongpang namar ba shisien ba bakla, ka lah ban buh jingma ia ki nongshah sumar.
La ioh jingtip ba don ki bym bna eiei watla ki la ioh ia ka syrnot ba ki la pyndep ia ka jingpule jongki.
Ban lait na ka jingshah pynbiej shah pynthame ha ki ejen kiba ju ialam ia ki sha ki jaka pule bapher bapher shabar jylla, khamtam na jaka nongkyndong, ka long kaba donkam ban don ka jingpynshai ka jingialap paidbah ban pynsngewthuh ia ki kmie ki kpa kiba la pynlut da ki lak da ka jingkyrmen ban pynjanai ia ki khun hynrei ki kylla bijai ei pynban kha ma kha.
Katkum ka jingtip, la don da ki spah ngut ki samla kiba pule nabar kiba la wan rejister ialade ha ka Meghalaya Nursing Council kaba dei ka nongai license ia ki. La iathuh ba wat ki bor pyniaid jong kane ka Nursing Council kim shym la lah ban leh eiei halor kane watla ki lap ne shem ba kim biang hynrei ka hap beit ban ai license ia ki namar ba kam pat don ka kyndon ka sorkar kaba khang lad ban ai license lada lap ne shem ba kim biang ne kim long kiba tbit katkum ka jingpule jongki.