Shah kawang petrol bom ka bos ha Nongmensong

Shillong, 31 Jymmang:
Kawei ka bos, kaba kit ia ki pulit kiba pahara ia ka nongbah Shillong, ka la shah wiang ding mynta ka miet, ha Nongmensong, katba ka dang ieng ha syndah jong ka thanat ki pulit ha katei ka jaka.
La iathuh ba katei ka jingjia, ka dei ha ka por 8.30 mynta ka miet, ha kaba ka bos, kaba don ia u number ML 05 8515, kaba kit ia ki pulit CRP, ka dang ieng ha katei ka jaka, ha kaba u nongniah u dang leit rung sha la iing; hynrei tang hadien khyndiat minit, haba ula wan phai, ula lap ba kali ka la kem ding bad ki iit ki la pait lut bad ka bynta ba shakhmat, kaba shong u nongniah, ka la ingkhong lut ki jaka shong bad khyndiat sha ki bynta ba shadien ruh kumjuh. Katei ka kali, la iathuh, ba ka dei kaba niah da U Krishna Thapa, 39 snem.
Ki kali pynlip ding, ki la wan beh mar mar bad la lah ban pynduna ia ka jingjulor jong katei ka kali.
La iathuh ba ki pulit mynta ki la pahara da ki phew kali sha Nongmensong, Polo, Pynthor, Demseiniong, na ka bynta ban thwet ia ki briew kiba donkti ha katei ka kam pyntriem.
Ha kawei pat ka jingjia, la iathuh ba ka don ka jingthmu ban kawang petrol Pump ha Ruprekha High School, Wahingdoh; tangba um shym la bthei satia bad ka la shu don tang ka jingsma petrol hajan katei ka skul. Katei ka la jia ha ka por 9.30 mynta ka miet.