Shah kem 3ngut, naba leh thok ha ka ia mareh kam pulit

Shillong, 31 Jymmang:
Ki Pulit ki la ujor ejahar pyrshah ia ar ngut ki samla ialeh kam pulit halor ka jingthok jongki da kaba phah mareh da uwei bad wan ialeh interbiw hi dalade.
Kine ar ngut kiba la shah kem ki dei u Esstan Rilang Sohphoh bad u Tynshainlin Wanniang, kiba aplai ia ka kam Follower. Ia ki kam buit tuh jong u Esstan Rilang la lap mynta ka sngi, ha ka por shim ia ka interbiw katba ia u Tynshainlin Wanniang la lap hynnin ka sngi.
Katkum ka jingia-thuh u Principal ka Police Training Schools, Maw-iong u Bah Lakador Syiem uba dei ruh u Member secretary ka Central Recruitment Board; kine ki briew ki la phah mareh lem ha ki paralok jongki, da kaba shu siew pisa bad ki la wan ban ialeh interbiw da lade hynrei sniew bok, ki la shah kem noh syndon na kane ka kam buit tuh jongki.
“Ngi la ujor ejahar ia kine bad ka jingtohkit ka ain kan iaid”, la ong u Bah Syiem.
U la ong ba ka Central Recruitment Board kan sa shong ban pyrkhat halor kane bad kan lah ban leh da kaba tyngeh ban khang lad ia kine kiba leh tuh ban nym shah shuh ba kin aplai kam sorkar”, u la ong .
Kiwei ki lad ki khubor, ki iathuh ba uba leit pyn mareh lem ia kitei ki arngut, u dei U Marvellous Kharjahrin, uba na Sakwang, West Khasi Hills bad utei ula leit pyndem noh ialade ha khmat ki pulit ha Sardar Police Station. La iathuh ba utei u briew, ula mareh lem ia 3ngut ki samla ialeh kam pulit, wat la ki lad khubor, ki iathuh ba kin lah ban don kham bun ngut shuh, kiba ula pyn mareh lem.
Ka jinglap ia ka jingleh buit tuh jong utei u briew, ka long haba kitei ki arngut, ki leit ban rung sha ka interview da ka met jongki ha Police Training School mynta ka sngi bad haba ki la ktah ia ka biometric machine, la lap ba ki shympriah kti jongki, kim iahap satia bad kito kiba leit mareh ha Mawiong bad kumta kitei ki la shah kyntait noh bad katei ka la pynlong ia ki pulit, ba kin sngewthuh ba kitei ki arngut ki don bynta ha ka jingleh tuh, ha ka por ba ia mareh ha Mawiong, ha kaba ki la pyn mareh da uwei pat u briew, namar ba ha Mawiong ruh, ki la dep thew ia ka rynieng, ki la dep shondur bad ki la dep phah ktah ruh ia ki shympriah kti ha ka machine biometric.