Ther ka KSU halor u DC ka Ri Bhoi

Nongpoh, 30 Jymmang:
Haba pynshai halor ka jingkam da u C.P Gotmare, Deputy Commissioner ka Ri Bhoi, uba la ong ba ki paidbah nongshong shnong ka Ronghona ki pdiang ia ka jingwan jong ka surok Rel, u Lambok Rymbai, General Secretary ka Khasi Student Union, North Khasi Hills District, ha ka kyrwoh kaba la phah sha ki nongthoh-khubor, la buh ia kka jingkylli sha u DC ka Ri Bhoi, da kaba ong ba kumno ki paidbah tang na kawei ka shnong ki lah ban shim ia ka rai jong u paidbah ha ka Jaidbynriew Khasi Jaintia.
U la ong ruh, ba bun na ki briew kiba shong ha katei ka shnong Ronghona kim dei ki Khasi bad dei na kata ka daw ki briew kiba shong ha katei ka shnong ki pdiang bad kim sngewthuh namar ba kim dei ki Jaidbynriew Khasi bad ka long ruh kaei kaei kaba ym lah khlem da pynrem ba ki briew ki bym dei Khasi, kim shim ia ka rai ban pdiang ia ka jingwan jong ka Surok Rel sha ka Bri U Hynniewtrep.
“Ha ka Public Hearing kaba la long ha u snem 2011, haduh 80 percent na ki paidbah nongshong shnong ki pyrshah halor ka jingwan jong ka Surok Rel ha ka jylla, ha kaba wat na ka liang ki nongialam ka Byrnihat Sports Association ki kyrshan ban pyrshah ia ka Surok rel, hynrei ka long pat kaba lyngoh ba u DC ka Ri Bhoi un shu pynbna paidbah ba ki paidbah ki pdiang sngewbha ia ka surok rel sha ka jylla” ong u Lambok Rymbai.
Ka seng hi kan iaibuh beit ia ka jingpyrshah ia ka surok rel, katba ka sorkar kam pat lah ban shna ia ki ain ki ban the pyrkhing halor ka rung ka mih jong ki mynder ri sha kane ka jylla Meghalaya, ha kajuh ruh ka por u la ong ba lada kwah ba ka shongsuk shongsain kan don ha Ri Bhoi, ka seng ka dawa ban pyllait noh mardor ia kito nongialam kiba shah kem bad ban sangeh noh ka jingthwet ia ki dkhot ka seng.
Haba iadei bad kane, na ka liang u Bandari Ryntathiang, President ka Confederation of Ri Bhoi People (CORP), ki la ai ka jingkyrshah kaba pura ia ka Khasi Students Union, kaba la ieng ban pyrshah ia ka surok rel, ka CORP ka dawa ruh ia ka sorkar ba ka dei ban pyllait noh mardor ia ki nongialam ba la shah kem ka KSU, na ka bynta ban wanrah ia ka shongsuk shongsain ha ka Distrik, khamtam eh ha kane ka por ba ka Ri Bhoi ka dang don ia ka jingpynkhreh ban rakhe ia ka jingdap ba 25 snem.