Ka la bha ia nga ban ym kyrmen shuh ha ki seng riewlum: HS Shylla

Shillong, 28 Jymmang:
“Ka rai jong ka UDP bad ka HSPDP ha ka 25tarik Jymmang 2017, ka biang ban long tang um ka jingsdang, hynrei lada ki pyrkhat ba tang katto ka la biang, ngan ym don eiei shuh ban ong” ong ka kyrwoh jong U Bah HS Shylla MDC jong ka seng UDP.
U MDC, ula ong ruh ba katei ka rai, ka dei kaba shu rai kyrkieh, khlem da kynthup lang ia ka KHNAM bad ka PDF bad khlem da pynpaw ia ka jingdonkam ia ka jingnoh synniang lang jong ki khraw pyrkhat jong ka jaidbynriew bad ia ki Seng Bhalang kiba la im sngi da ki snem ki snem khlem thait ban peitngor ia ka khia ka shon bad ka iap ka im jong ka Ri bad ka Jaidbynriew.
U Bah Shylla, ha katei ka kyrwoh khubor, kaba ula pynmih mynta ka sngi, ula ong shuh shuh “Ka jingai jingmut jong nga ka thew ia ka lynti bah, ym tang ban pynjop elekshon ia ki katto katne ngut, lada ka jingai jingmut jong nga ka long tang katkum ka jingmut jong kine ar ngut ki President badonburom ka UDP bad HSPDP, ka la bha ia nga ban ym buh jingkyrmen shuh ha ki Seng Riewlum. Ka jingiamynjur kyrkieh halor kane ka jingiatreilang kaUDP bad HSPDP ka la pynjot bun ia ka UDP namar ba u President ka UDP u la shu pyndem ia lade ha u President jong ka HSPDP tip na kano daw. Kumta ka jingkitkhlieh baroh kan hap ha u President ka UDP lada kaei kaei kaba sniew kan jia ia ka UDP ha kine ki sngi namar I la shu pynbeit sop sop kat ia kane ka jingiatrei lang naduh kaba sdang kaba la pynsngewsih ia ki katto katne ki MLA ka UDP bad ruh ia katto katne ngut ki Samla bad ki Rangbah”.
U Bah Shylla, ula sot ruh ia ka jingiakren jong U bah Ardent bad U Rupang, kaba la pynmih ha ka 19tarik Jymmang 2017, ha kaba U bah Ardent Basaiawmoit, ula ong “Ka rai u briew shimet, ym lah ban ong ei ei .. Ngan ong nga sngew kumno, haba ki briew ki kwah kyrshan, ngi ia trei ia ka kam, ba ki briew kin kyrshan.” Halor katei ka mat, U bah Shylla, ula ong “Phi tharai ki paidbah na ka UDP kin nud shuh ban leit kyrshan ia I Bah Ardent bad ban leit wad jingiarap haba donkam hadien ba la jop ia ka elekshon? Namar khlem pep in ong ia ki ruh – “Ka dei ka rai jong phi shi met ba phi ia kyrshan ia nga, ngan ong kumno haba phi ia kwah hi ban kyrshan? – khamtam haba I la dep kren shai kdar ha ka jingialang ha Lad Nongkrem dang shen ba ka kam jong I ka dei kum u nongiasaid ym kum u nongleh isynei”. “Kumta, na ka liang jong nga ngan dang hap ban shong pynjahthait shwa shipor shwa ban shim pat ia ka rai kaba thymmai” ong shuh shuh ka kyrwoh U bah Shylla.