Shillong, 26 Jymmang:
Tang mar ia sdang ka jingiateh lok hapdeng ka HSPDP bad ka UDP ban ia treilang ha ka elekshon MLA 2018 ha ka jylla, ka la sdang ruh ka jingpait jingpra bad ka jingduh nong ba nyngkong eh ka dei ka UDP ha kaba mynta ka sngi la pynduh pyndam syndon ia katei ka seng ha Nongkrem Konstitwensi. U General Secretary ka UDP Npngkrem u bah Teiskhem Kharmuti u la iathuh ba mynta ka sngi ka la don ka jingialang jong ka seng UDP Nongkrem bad ha katei ka jingialang kaba la donlang u MDC bah H.S Shylla la pynwai noh ia katei ka seng bad la pynduh pyndam noh shisyndon.
U bah Teiskhem u la ong ba ia katei ka rai la shim hadien ba ka Party ka la iatai sani bha bad ka la lap ba u President Rangbah ka UDP u Dr.Donkupar Roy um shym la kynjoh ktien tang shi kyntien ruh ia ka Circle, hynrei u la shim beit beit ia ka rai ban ia treilang bad ka HSPDP tang lyngba ka jingiakynduh sop sop tang 2 ngut hi bad u bah Ardent M Basaiawmoit President ka HSPDP. U bah Teiskhem u la ong ba la pynkhlain ia ka UDP ha Nongkrem ha u 2016 da ka jingthmu ban pynrem ia u bah Ardent MLA ka Nongkrem bad dei halor katei ka nongrim ba ka HSPDP ka la shah rem kput ha ka elekshon MDC shiteng samoi. “U Dr.Don um shym la khein snep ia ki 6097 vote ka Nongkrem hynrei u kheiñ kordor ia ka 4122 vote ka UDP, ngi nangkhmih lynti ba un pan jingmut na ka Circle hynrei u leh donbor pynban” ong u bah Teiskhem.
U bah Teiskhem u la ong biang , “Ngi la isih palat ia u MLA jong ngi u bah Ardent, ngi la trei shitom ban pynjop ia u bah Shylla ban pynrem ia u ha ka elekshon MDC shiteng samoi bad ngi la ioh jingjop, ngi da thrang eh ban pynrem biang ia u bah Ardent ha u 2018 bad ngi don ka thong ban pynrem beit hynrei u President ka UDP u nguid noh ia la ka prie tang na ka daw ba u tieng ioh u bah Teinwell u ia leh pyrshah ia u , u tieng ia ka PDF” ong u bah Teiskhem. Lah ban kdew ba ka UDP ha Nongkrem ka la kam ba ka jingjop ha ka MDC elekshon ka dei tang ka Yellow Card hynrei ha u 2018 kan ai Red Card ia u bah Ardent, haba ia kren halor katei ka bynta u bah Teiskhem u la ong ba kiei kiei kin sa nang paw nangne shakhmat. Lah ruh ban kdew ba u bah Shylla ka UDP u la ong ba ka HSPDP kam shym la poi shuh sha ka phainal naba kam wan tang ha ka kyrdan ba-ar ruh hynrei ka la hiar sha ka kyrdan ba-lai ha ka MDC elekshon, halor katei ka bynta ruh u bah Teiskhem u la ong ba yn ia sa ia kren hadien.
Kham hadien u bah Teiskhem u la ong ba bun kiba la phet seng na ka UDP hynrei don tang katto katne ngut kiba dang neh bad ka UDP.
Phi don ban ong eiei?