Mynsaw u khynnah skul, ba twa ka kynroh ha Nongpoh

Nongpoh, 26 Jymmang:
Uwei u khynnah skul jong ka St. Paul Higher Secondary School, Nongpoh, uba la tip kyrteng kum u Pius Sharma (13) bad uba dang pule klas V1 u la mynsaw jur hadien ba ka kynroh kaba dang shu shna thymmai jong katei hi ka skul ka la khyllem kynsan ha kawei ka dukan kaba don hajan jong katei ka skul bad ha ha katei ka jingjia ka la bhan ruh ia utei u khynnah uba dang don ha katei ka dukan.
Kane ka jingjia ka la jia mynta ka janmiet ha ka por 4 baje 20 minit, namar ha katei ka por ka don ruh ka jinghap slap kaba jur bha ha Nongpoh bad ka daw kaba la pynlong ia utei u khynnah ba un shah bhan ha katei ka kynroh, ka dei ruh hadien ba u leit ban rieh slap ha katei ka dukan.
Ia u ne u khynnah skul u ba la mynsaw jur na ki bynta jong ka khlieh bad ka kjat la ioh ban sei noh, namar ka jingkloi iarap da ki briew kiba don hajan jong kane ka dukan bad ruh ban rah mar mar sha Bethany Hospital, Nongpoh ban ioh ia ka jingsumar kaba kyrkieh.
Haba ia kren bad I Sr. Jemma J. Dkhar, Headmistress jong ka St. Paul Higher Secondary School, I la iathuh ba katei ka jingjia ka la jia ha ka por ba u dang hap slap jur bha ha Nongpoh, bad ka dei ruh ha ka por ba dang shu wai skul, ha kaba u tei u khynnah skul u la mih na ingskul bad leit ban rieh slap ha katei ka dukan kaba don hamar pyrshah jong kane ka skul.
Ka Sr. Dkhar ka la ong ruh, ba tang mar ia ioh jingtip halor kane ka jingjia na ka liang ki nonghikai ha ryngkat bad ka ki la leit mareh mar mar sha katei ka dukan bad ruh ban iarap sei ia u tei u khynnah u ba la sahkut hapoh ki maw bad ka khyndew, bad mar mar ia ioh sei ia u la rah noh sha Hospital ha Bethany ban ai ia ka jingsumar bad ruh ban leh ia ka X-Ray.