Kynduh jingeh ki paidbah bad ki Doctor ha Pdeinshakap PHC

Jowai, 26 Jymmang:
Ki paidbah khamtam ki nongpang bad ruh ki nongtrei bad ki doctor jong ka PHC kaba don ha Pdeinshakap, ki la ia kynduh jingeh ban ai ka jingshakri kaba biang ia ki paidbah ka thain.
Ka Pdeinshakap PHC ka don haduh 38 tylli ki shnong bad ka jingbun briew kaba la palat pud. Ki nongpang kiba wan ban thiah pang kim ioh jaka thiah bad ki hap ban thiah ha madan tang ban ioh ka jingsumar.
Katei ka jaka ai jingsumar kaba rit, ha ka jingshisha kadei ban don tang san jingthiah, hynrei na ka bynta ban iarap ia ki nongpang, ki Doctor bad ki Nurse ki la hap hi ban pynbiang sa san tylli, katta katei ka PHC ka don 10 jingthiah. Hynrei na kitei ki 10 jingthiah, ki don tang phra tylli ki jingthiah kiba dang lah ban pyndonkam.
Nalor katta, ka jingdon ki nongtrei jong ka PHC naduh ki Doctor bad ki Nurse kam iahap shuh ba ka jingbun ki nongpang. Ym duna ia ka 120 ngut ki nongpang kiba wan shim dawai man ka sngi na ki 38 shnong katba ki Doctor ki don tang ar ngut kiba kynthup ia uwei u Doctor MBBS bad uwei u Doctor Ayush. Ki don tang 4 ngut ki staff Nurse – ar ngut na ki kidei kiba la thung tang kum ki contract.
Uwei u Pharmacist uba don tang mynsngi bad uwei u Lap Technician. Tang kawei ka LDA, ym don UDA. Katei ka LDA ka hap ban peit lut ia ki kam ophis bad ka jingkhia kam kaba palat khamtam ha kaba iadei bad ki Birth Certificate.Ka PHC ka don saw ngut ki nongtrei grade IV.
Na ka liang u Rangbah Shnong ka Pdeinshakap, u ma Forward Shylla u la ong ba kane ka PHC ka la ai ka jingshakri kaba bha tam ia ki paidbah ka thain bad baroh kiba trei ha katei ka jaka kidei kiba trei shitom hynrei ngi kum ka shnong bad kum ki paidbah ha kane ka thain ngi iohi ba ka jingkhia ka kam jong ki ka la long shaba palat.
Ki kamra thiah pang ruh ki long kiba jaw um. Tang shu slap baroh ki kamra ki la dap um lut namar ka jingjaw um, la iathuh kawei ka longkmie kaba ap nongpang.
Na ka liang ki Doctor bad ki Nurse ki la pynpaw ba katei ka PHC ka la donkam ia ka iing dewbilat kaba thymmai namar katei ka iing tin ka la jot bad rim palat.
Na ka liang u Rangbah shnong u la ong ba ka bor shnong ka la dep thoh sha ka tnad naduh u snem 2015 hynrei ka tnad kam pathiaw satia ia ka jingud jong ki.