Hapoh 3 taiew, plie ia ka Civil Sub Divn ha Mawshynrut ne yn rai iakhih

Nongstoiñ, 26 Jymmang:
Ka Mawshynrut Civil Sub Division Demand Committee, (MCSDDC) da kawei ka sur ka la shim ia ka rai ban dawa na ka sorkar Jylla ba ka dei ban pynkloi noh ia ka jingplie ia ka Civil Sub Division jong ka Mawshynrut bad katei ka Committee ka la ai por ruh ia ka sorkar Jylla haduh ka15 tarik u bnai Jylliew ban pyndep ia katei ka bynta.
Katei ka rai kala mih ruh mynta ka sngi ha ka jingialang bala pynlong da ka Mawshynrut Civil-Sub Division Demand Committee (MCSDDC) hapoh ka iing Dorbar Shnong Riangdo, na ka bynta ban ia pyrkhat bad ban iatai sani bha halor ka jingpynslem jong ka sorkar Jylla ban plie ia ka Civil Sub – Division ha katei ka thain.
Haba iakren bad ki nongthoh khubor hadien ba la wai katei ka jingialang na ka liang jong u samla Arkhelos Diengngan u ba dei ruh u Chairman jong katei ka Committee u la ong ba ka jingthmu jong ka Demand Committee ban pynlong ia katei ka jingialang ka long hadien ka jingpynslem jong ka sorkar Jylla ban plie ia ka Mawshynrut Civil -Sub Division, katba ia ki lai tylli kiwei pat ki Civil -Sub Division bala pynbna da ka sorkar la dep ban plie lut bad mynta kaba sah ka dei sa tang ka Mawshynrut.
Shuh shuh u bah Diengngan u la ong ruh ba na ka liang jong ka Demand Committee da kawei ka sur ka la shim ia ka rai ban ai por ia ka sorkar Jylla haduh ka 15 tarik Jylliew, ba kadei ban pyndep noh ia ka jingplie ia ka Mawshynrut Civil -Sub Division bad lada ka sorkar jylla hapoh ka jingialam jong u Dr. Mukul Sangma kum u Myntri rangbah kam lah ban pyndep ia ban plie ha katei kapor bala buh na ka liang jong ka Committee kan shim da kiwei pat ki lad ki lynti ban pynbor ia ka sorkar.
Katba na ka liang jong u bah G. Sohshang Secretary katei ka Committee u la ong ba ha kaba iadei bad ka jingpynslem jong ka sorkar Jylla ban plie noh ia katei ka Civil Sub Division, na ka liang jong ka Committee ka la dep ruh ban leit ia kynduh ia u bah S. Kharlyngdoh DC barim bad kumjuh ruh ia u Arun Kumar Kembhavi DC thymmai jong ka West Khasi Hills District, ban pan jingtip halor ka jingplie ia katei ka Civil Sub – Division, hynrei kitei ki khlieh jong ka District kila ong ba kim shym pat la ioh kano kano ka jingtip na ka sorkar halor katei ka bynta.