Pan tiket U MLA barim na ka UDP, na Pynursla ha u 2018

Shillong, 25 Jymmang:
U MLA barim ka Nongshken u Bah Khan Khong Dkhar u la pan tiket na ka UDP ban ia aireng na Pynursla constituency, East Khasi Hills ha ka ilekshon ka ban long ha u 2018. U Bah Khan u la bat ruh kum u myntri sorkar ha ki snem ba la dep.
U Bah Khan uba la long u Vice President ka President ka Meghalaya Pradesh Congress Committee (MPCC) u la mih noh na ka Congress ha ka 27 tarik Kyllalyngkot 2016 bad pyniasoh sha ka UDP ha u snem 2016 lyngba ka Lapalang unit da ka jingkhot sngewbha jong ka Kong Banalari Khongwar kaba long ka President jong ka UDP Pynursla circle.
Dei ha ka jingialang jong ka UDP Pynursla circle kaba la long ha ka 10 tarik Risaw 2016, la pdiang sngewbha ia u Bah Khan sha ka seng ha ka jingialang ki nongialam ka UDP seng kmie kum u Dr. Donkupar Roy bad kiwei ki dkhot jong ka circle.
Ha ka 17 tarik mynta u bnai, u Bah Khan lyngba ka shithi ba u la thoh sha ka President ka UDP Pynursla circle u la tyrwa ba u kloi ban long kyrtong jong kane ka seng na Pynursla constituency ha ka ilekshon ka ban wan bad ia ka kyrteng jong u Bah Khan la dep phah sha ka Central Election Committee ka UDP East Khasi Hills District ban bishar bniah da ki nongialam.
U Bah Khan u la shah jied teng kum u MLA haduh arsien na Nongskhen constituency kata ha u 1998 haduh u 2003 bad ha u 2003 haduh u 2008 bad u la long MDC na kane kajuh ka constituency ha ka ilekshon kaba la long ha u 1994, 1999 bad 2004.