Pluh lai tylli ki iing ha Langpih, suba ba thang dusmon

Nongstoiñ, 25 Jymmang:
Kat kum ka tyllong khubor ba la ioh lum da u nongthoh khubor la ong ba hynnin ka shiteng synnia, ki lai tylli ki iing briew kiba don ha ka thain Langpih ki la pluh bad kem ding kynsan kynsan haduh ban da ingkhong.
Shuh shuh ka tyllong khubor ka iathuh ruh ba kitei ki lai tylli ki iing kiba la pluh noh, ki kynthup ia ka iing jong u bah Samuel Wanniang na ka shnong Umwali, Sminglang Syiemlieh na ka shnong Umbyrsit bad ka iing jong u bah Everless Kharsyiemlieh na ka shnong Mawsikar kiba don ha ka thain Langpih.
Ka jingpluh kynsan kynsan jong kitei ki iing ka la pynsuba jur ia ki paidbah ka thain Langpih ba don ki riew shim kabu kiba la thang dusmon ia kitei ki lai tylli ki iing, hynrei ka tyllong khubor ka iathuh ruh ba donbok ba ha katei ka jingpluh iing ym shymla don kano kano ka jingjia ba sngewsih ne mynsaw.
Ym tang kata ka khubor bala ioh lum ka iathuh ruh ba baroh kitei ki iing kiba la pluh bad suba ba shang thang dusmon ha ki runar ki dei ki iing jong ki Khasi bad haduh ba la thoh ia kane ka khubor ym shym pat la lah satia ban pyntikna ba ha kano ka rukom ki tei ki iing ki pluh bad ka ei ka daw kaba pynlong ia ki tei ki iing ba kin pluh. Halor katei ka jingjia na ka liang jong ki trai iing kiba la iakynduh ia katei ka apot, ki la leit ban pyntip noh ia katei ka jingjia sha ki pulit khnang ba kin pynlong ia ka jingtohkit kaba bniah ban lap ia ka daw jong katei ka jingjia.