Ngim ithuh ia ka PDF kum ka seng sain pyrthei:Dr Don

Shillong, 25 Jymmang:
U President ka UDP u Dr Donkupar Roy u la ong ba ka UDP bad ka HSPDP kam pat ithuh satia ia ka People Democratic Party (PDF) kum ka seng sain pyrthei haduh mynta namar ba kam pat thikna wat tang ia u nongialam jongka u.
Haba kren mynta ka sngi, ha kaba la don lang u Bah Ardent M Basaiaw-moit, u Dr Donkupar u la ong ba haduh mynta wat u nongialam jong ka PDF ruh (u Bah Pynshngain N Syiem), um pat don namar ba u dang dei u Congress uba shah sospen. “Ngim pat ithuh ia ka PDF kum ka seng sain pyrthei haduh mynta”, la ong u Dr Donkupar. Ha kajuh ka por u la wer ruh ia kiwei ki seng sain pyrthei ban wan iatreilang bad ki na ka bynta ka jingbit jingbiang jong ki paidbah.
Halor ka jingkylli ia ka jingiadon bynta bad ka North East Democratic Alliance (NEDA) u Dr Donkupar u la ong ba ka NEDA ka dei tang ka seng ban peit ia ka roi ka par bad kam dei ka rynsan ban iatreilang ha ka elekshon. Ha kajuh ka por, u la ong ba ka la don ka jingiakren bad ka NPP hynrei kam pat don satia ka rai ban don ka jingiatreilang hynrei ka UDP ka la iaid beit ban pynkhreh ia ka elekshon ha Garo Hills da kaba wad ka jingiatreilang bad kiwei ki seng riewlum na Garo Hills.
Katba u Bah Ardent u la ong ba ka HSPDP watla kam don bynta eiei sha Garo Hills hynrei kan leit ban iarap ia ka UDP ha kano kano ka bynta ba ka donkam. U Bah Ardent u la pynpaw ia ka jingsngew burom ia u President ka UDP uba la pynwandur ia kane ka jingthmu ban wanrah ia ka jingiatreilang hapdeng kine ki ar tylli ki seng riewlum ha ka jylla.