Na Pomlakrai bak sha Lum Shyllong, bloit haduh 5mer, une u nong thoh, u iaid lynti ha ka Lah Sngi U Blei. Khlem poi pyrkhat, la iohi, ha baroh arliang surok, wat kumjuh ha ki pdeng wah, ba don pleng bun ki nongrep, kiba dang ia sei ia ki muli bad ki kubi ban ia lum ia lang bad ban ia sait, na ka bynta ban pynkhreh ba ki mahajon kin wan thied ia kitei ki mar rep.
Dei tad ynda poi ha ranab u lum shyllong, ba don saw san ngut ki rangbah, ba u nongthoh khubor, ula iakren kham bniah, ban tip shaphang ka jinglong jong ka rep kubi, ka rep muli nalor kiwei kiwei.
U Ma Bening, uba na Mawkhan, mar ia kylli une u nongthoh, ula ieng joit naba shong bad leit shim ia uwei u kubi, uba la heh mlun bad antad kumba ar kilo, hynrei, haba la kylli, ia ka dor jong u jhur, u kren diaw mynsiem, da kaba ong ba kat utei u kubi, ka dor jongu, kan long kumba T.10 lane kaba long tang T.5 antad shi kilo.
La bteng shuh U Bah Bening, ha kaba u iathuh, ba ka jinghiar dor u kubi bad u muli, mynta u snem, ka long kaba la jubor shibun, ha kaba ka dor kam iahap shuh, na kaba long ha u snem ba ladep. Ula ai nuksa, da kaba ong shuh shuh “Ka sboh shi trok, ka shongdor T.40hajar, hynrei ka jingmih ka long tang T.20hajar”. Katba ha u snem ba ladep, ka dor jong u kubi, na ki nongrep na lum, ka long T.10 lane T.15 shi kilo bad u la ong shuh shuh “Myn shem snem, ngi ia ioh nong malu mala”. Ka jingkhein ia katei ka bai sboh, ka long beit tang ka sboh shi beit, khlem pat khein ia ka dawai Urea, ka bai trei bad kiwei kiwei ki jinglut.
U bah Droning Marbaniang, 50snem uba na Mawkhan, haba iathuh ha u nongthoh, u ong ba tang na shnong Mawkhan, ka jingmih jong u kubi ha ka shisngi shisngi, ka por sha ka 15,20ton, hynrei, u iathuh ba na ka jinghiar palat jong ka dor, ka jingrem ka bai trei bylla, ki la don bun ki nongrep, kiba iehnoh ia ki mar rep hapoh khyndew, namar ba kim sngew myntoi shuh ban tih bad ban die, namar ba ki la duhnong lypa. La iathuh ruh, ba ha kine ki sngi, la antad, ba na katei ka 15ton, kumba shi powa eiei, u kubi, la shu iehnoh hapoh khyndew, lane la sei ban shu bsa sniang.
La iathuh shuh shuh, ba mynta ka dor jong u muli, ka long T.3 shi kilo, kaba long ka dor kaba tad tam ha kine ki snem ba ladep, na kaba ju long T.8 ne T.10 ha ki snem ba ladep.
Kitei ki nongrep, ki ud rup ia ka jingkiewdor ka khajna ha Iewduh, ha kaba lada ia khein ia bai khrong Syiem, ka bai kit, bai kali bad kiwei de, ka poi T.30 shi ruh, na ka bynta 25kilo eiei.
Phi don ban ong eiei?