Saw bnai jah ka samla na Ialong, ba pule nurse ha Guwahati

Shillong, 24 Jymmang:
Kawei ka samla kaba dei na ka shnong Iaiong, Jaintia Hills ka la jah klep la saw bnai haduh mynta. Kane ka samla kaba la tip kyrteng ka samla Lamedaki Rymbai 24 snem, ka dei kaba trei pyntbit (internship) ha ka GNRC Hospital, Guwahati, ka la jah naduh ka 2 tarik Rymphang 2017.
Katkum ka jingiathuh ka kmie jong kane ka samla, ka Kong Jemina Rymbai, ka khun jongi, ka dei kaba pule nurse ha International Hospital Guwahati bad ka leit pyntbit ne intership ha katei ka hospital.
Ka kmie jong kane ka samla, ka la iathuh ba ka khun jongka, ka la shah rahbor ha ki runar bym lah ban tip haduh kine sngi, wat la ki pulit ka Assam lyngba ka jingshim khia jong ki pulit ka Meghalaya, ki la ioh kem uwei u briew uba don ka mobile jongka.
Hynrei kaba sngewsih ka long ba haduh mynta kam shym la iaid shaphrang kane ka kam namar ba ki pulit ka Assam kim shym la shim khia satia.
Ka la iathuh ba ka la ioh ban iakren khadduh ia la ka khun jongka naduh ka 2 tarik Rymphang por 6 baje janmiet bad naduh katei ka sngi, kam shym iohi, kam ioh sngew shuh shaei ka don.
La ujor ejahar ruh ha Dispur police station bad ha Shillong halor kane ka kam tangba kam pat ioh shaei shaei ruh ha kaba ka longing ka la sah ha ka umdum haduh mynta. Mynta ka kong Jemina, ka iathuh ba ka sah ha ka lyngngoh bad jingkhuslai namar ka jingbym sngew nang shuh ban leh eiei.