Ka jingdawa hiar khet, dei ka jingbuh shun, ong U Syiem Marwet

Nongpoh, 24 Jymmang:
Haba pynshai paidbah halor ka jingmih khubor kaba ong ba ki khun ki hajar ka Raid Marwet, ki la dawa na ka KHADC bad Hima Mylliem ban pynhiar khet noh ia u Paiem Ken Syiem ba un long kum u Syiem jong ka Raid Marwet, namar ka jingai No Objection Certificate (NoC) jong u ban buh ia ka Par Maw ha ka jaka kaba dang hap hapoh ka Lawkyntang kaba don hajan ka shnong Killing.
Haba iadei bad katei ka khubor, na ka liang u Paiem Ken Syiem, u la ther kylla ia kitei kiba la dawa na ka KHADC bad Hima Mylliem, da kaba ong ba katei ka jingkynnoh kaba la lamkhmat da u Bah Ioanis Narleng, Rangbah shnong ka Baridua bad u Bah Hemu Maner pyrshah ia u kam dei na kano kano ka kam, hynrei ka dei tang namar ka jingiashun shimet bad u Paiem Ken Syiem.
Kat haduh mynta, katei ka Law Kyntang kam don ia u pud u sam uba tikna bad halor katei ka jingkynnoh ba u la ai NOC ban bun Par Maw ha katei ka Law Kyntang, kam da long kaba shong nongrim, namar hajan jong utei u Law Kyntang ki dang don kiwei pat ki Par Maw bad ka jingkylli kaba mih hangne ka long ba balei ki pyrshah tang ia katei kawei ka Par Maw, hynrei ia kiwei kiba don marjan ym shem la don kano kano ka jingpyrshah, ha kaba kane ka pynsuba pynban ba ka lah ban don kaei re kaei sha lyndet, u la ong.
U la ong ruh ba wat na ka liang kitei ki trai jong katei ka Par Maw, ki long kiba kloi ban iakren sha ka lynti bad kular ruh ban ai sha ka Law Kyntang, lada katei ka jaka kaba ki la pynlong Par maw, ka hap shisha hapoh u Pud u sam jong katei ka Law Kyntang, hynrei ka long pat kaba lyngoh, ba na kitei kiba la pyrshah kim shem la treh ban wan sha ka miej jong ka jingiakren.
Namarkata, haba iadei bad kane na ka liang u Paiem Ken Syiem, u la kyntu ia ka District Council bad Hima Mylliem ba kin weng noh shisyndon ia u Bah Ioanis Narleng na ka jinglong kum u Rangbah Shnong ka Baridua, u la bynrap.