St.George, Ramakrishna, ha ka kyrdan nyngkong ha ka Matrik

Shillong, 23 Jymmang:
Ka St.George Secondary School Nongmensong, Shillong bad ka Ramakrishna Mission HS School Cherrapunjee- Sohra ki la bat ia ka kyrdan ba nyngkong ha ka resol Matrik mynta u snem. Ka Duyu Asung jong ka St.George bad u Lamphrang Lyngdoh ka Ramakrishna baroh 2 ngut ki la bat ia ka kyrdan ba nyngkong eh bad ki la ioh 568 mark na ka 600 mark.Marsien ioh jingtip ba katei ka skul na Nongmensong ka wan ha ka kyrdan ba nyngkong u MLA ka Pynthor u bah AL Hek u la leit mar mar sha katei ka skul bad u la ai T.5000 tyngka sha katei ka khynnah.
Ha kane ka sien mynta ka Synod Hihger Secondary School ruh ka la wan ha ka kyrdan kaba hakhmat ha kaba la don haduh 5 ngut ki khynnah na katei ka skul, kiba poi ha ka Top 20. Ka Dafica Kynter ka la wan ha ka kyrdan ba lai, ka Phibandariti Mawkon ka la wan ha ka kyrdan ba hynriew, ka Phibalabet shwa Nongrum ha ka kyrdan ba 11, ka Dakermedo Nongpluh ha ka kyrdan ba 15 bad ka Parkles Theolinda Lyngkhei ha ka kyrdan ba 19.
Ka resol mynta u snem kam da ia pher na kaba mynshem snem ha kaba ka jingpass ki khynnah ka poi tang 54.04% katba ha u snem ba la dep pat 54.10%. Ki la don haduh 50,974 ngut ki khynnah kiba la ia khun ia ka eksamin ha ki 134 tylli ki Centre bad na kitei kiba pass ki long tang 27,547 ngut bad kiba pheil pat ki don haduh 23,427 ngut. Ka West Jaintia Hills ka dei kaba pass bun bha ki khynnah kaba kot haduh 78.70% bad ka South Garo Hills pat ka dei kaba tlot duh ka kot tang 21.45%. Ki kynthei kiba pass ki kot 70.09% bad ki shynrang 71.51%.
Ha ka resol klas XII Arts pat ka Dimsonjem Vaiphei jong ka St.Anthony’s CHr Secondary School ka la ioh ia ka kyrdan ba nyngkong bud sa u Ricarldy Dkhar ka Synod College ha ka kyrdan kaba -ar bad u Calvin Ginminlein Zou ka St.Edmund’s ha ka kyrdan ba-lai. Kiba pass baroh ka klas XII ki kot sha ka 75.38% bad ka la kiew na kaba mynshen snem da 1.34%. Ki la don haduh 21,083 ngut ki khynnah kiba ia khun ia ka eksamin hynrei na kitei tang 15,609 ngut kiba pass. Ka East Khasi Hills ka la leh bha bad ka jingpass ka kot 87.54% katba ka East Garo Hills ka dei kaba tlot tam bad ka jingdon kiba pass ka kot tang 48.24%. Ki kynthei kiba pass ki kot 78.86% bad ki shynrang tang 59.95%.