Pynheh surok ha Mawkriah, bret khyndew sha phyllaw iing briew

Shillong, 23 Jymmang:
Ka FKJGP Upper Shillong Circle hadien ba la ioh ia ka jingujor na ka Seng Longkmie Mawkriah East halor ka jing trei thurmur jong ka BSC Company kaba pyntrei ia ka Surok ar kali, ha kaba ki phyllaw iing jong ki briew, ki la kylla jaka pynhap maw bad pynhap khyndew bad ia ka jing leh bym suid niew ia ka jingud jing nam jong ki Nong Shong Shnong ha kaba iadei bad ki jing ker ia ki kynroh kiba Shngain, ki nala um bad ki lynti iaidkjat (Foot Path) ba kan long ka jing shngain ia ka leit ka wan khamtam eh ia ki khynnah Skul kiba dei ban iaid lyngba jong katei ka surok bah man la ka sngi.
Ha ka 23tarik Jymmang 2017,ki Nongialam jong ka Upper Shillong Circle hapoh ka jingialam jong u Samla Donald Nongsteng, General Secretary FKJGP Upper Shillong Circle ha kaba la ia don ryngkat ruh ki nongialam jong ka Seng Longkmie Mawkriah East, Seng Samla bad ki Nongialam Shnong jong ka Mawkriah East kaba la lamkhmat hi da u Rangbah Shnong lem bad ki ophisar jong ka Tnad PWD Road, National High Way Division ki la pynlong da ka jing ialeit jurip lang ban lap ia ki jing shisha baroh.
Ha katei ka jing leit jurip la iohi ba ka don shisha ka jing leh thurmur na ka liang jong ka Company Shna Surok kaba la pynbitar ia ki Nongialam jong ka Seng, hynrei na ka liang jong ki briew jong ka Tnad PWD Road, National High Way Division kiba la ia don lang ha katei ka sngi ki la kular ban shim khia ban tuklar lang ia katei ka kam da kaba kin phah ia ka kaiphod sha ki bor kiba kham shalor wat ban phah ruh ia ka jing pyntip shaduh ka tnat shna surok jong ka sorkar India, na ka bynta ban shna kyrpang ia ki kynroh kiba shngain, ki Nala um bad ki Lynti iaidkjat,na ka bynta ka jingbit jing biang jong ki paidbah Nong Shong Shnong.
Na ka liang jong u Samla Donald Nongsteng, Genl.Secy FKJGP Upper Shillong Circle, u la pynpaw ia ka jing sngew bynniaw bad ha kajuh ka por u la kren shai ba lada ki bor ba dei khmih kim shimkhia ia ki jingdawa jong ka Seng ban pynurlong kloi katba lah ia ki jing donkam jong ki paidbah Nong Shong Shnong na ka liang jong ka Seng kam banse ban shim da kiwei pat ki lad ki lynti wat ban da poi haduh u pud ban pynsangeh shwa ia katei ka jing shna surok kaba la iaid shaphrang.