“Ka Congress U Purno & U Mukul, ka iapher ka bneng ka khyndew”

Shillong, 23 Jymmang:
U MLA barim na Jirang u Bah Slomik Kalwing u la ther ia ki nongialam ka seng Congress kiba mynta ki bym don ka jinglong nongia-lam kaba shisha ban ianujor bad ki nongialam ha ka por mynshuwa.
U Bah Kalwing uba dei u nongialam ka Congress haba kren sha ki nongthoh khubor mynta ka sngi, u la ong, “Nga la don ha ka seng Congress naduh u snem 1976, ka rukom treikam ki nongialam ha katei ka por kynthup u Purno A Sangma, Capt WA Sangma kiba bam kwai ha duwar u Blei, ki long kiba biang bha hynrei mynta hapoh ka jingialam u Dr Mukul Sangma, ka la kylla sha bneng sha khyndew bak ly bak”.
“Ngam ju treh ban ithuh ia u Dr Mukul kum u nongialam, ka longïing ka Congress mynta ka la dap sa tang ki kynrum kynram, ha man ki jingialang”, u la ong. U la kynthah ia u nongialam ka sorkar u Dr Mukul Sangma da kaba ong, “Ia kane ka sorkar la synshar da ki katto katne ngut ki briew, ym da ka sur jong ki paidbah”.
Katkum ka jingong u Bah Kalwing, dei na kane ka daw kaba la pynlong ia u ban sngew khia jingmut ba u la shim ia ka rai ban iasoh noh bad ka NPP hapoh ka jingialam u Conrad K Sangma uba dei u khun jong u PA Sangma, da kaba kyrmen ba un bud ia ka dienjat jong u kpa jongu.
“Nga kyrmen ba u Conrad un trei kumba la leh u kpa jongu”, la ong u Bah Kalwing. Ki riew pawkhmat kiba la wan ban iasoh bad ka NPP ha kane ka sngi na Jirang, ki long u Bah Wesley Doloi, Bah Kiewshaphrang Thabah, Bah Jonestar Nonglait uba dei nonghikai ka UCC, Bah Fullmoon Nongsiej, u Robert Sangma, Bah Eling Nongrum, u Santheng Sangma, u Cheris Marak, Bah Solomon Wahlang, bah Sranly Wahlang, Bah Himot Thangkhiew, Bah Reading Shadap, Bah BS Kharlur, Bah Manoi Byrsat, Bah Wanlambok Dkhar, Bah Kardinal Sohshang, bah Boring Diengan, bad bah Kobading Nongsiang. Kine ki dei ki nongialam ka Seng Congress bad kumjuh na ka HSPDP jong ka thaiñ Jirang kiba shah pdiang burom ha u president ka NPP u Conrad K Sangma.