Rai ka kabinet da ka Komishon, iada hok longbriew

Shillong, 13 Nailar:
Ka sorkar mynta ka sngi Hatmajai ka la mynjur ban thaw ia ka State Human Rights Commission (SHRC) ban iada bad ban peit ia ki hok briew man briew ha kane ka jylla.
U Myntri Rangbah ka jylla u Dr Mukul Sangma u la iathuh ha ki nongthoh khubor hadien ba la wai ka jingialang cabinet mynta ka sngi, ba ka jingthaw ia kane ka Komishon kan long ban pynrulong ia ka jingang nud jong ka sorkar ban shakri sha ki paidbah.
U la ong ba la thaw ia ka Komishon katkum ka kyndon jong ka ain ba la pas da ka Parliament kum ka Protection Human Rights Act 1993 bad ka Protection of Human Rights Amendement Act 2006 kaba bthah ia baroh ki sorkar jylla ban thaw ia ka Komishon ban peit ia ki hok briew man briew.
U Dr Mukul u la ong ba ka jingthaw ia kane ka Komishon kam dei tang ban iada hynrei kan peit ruh ia ki hok briew man briew jong ki paidbah ha kane ka jylla.
Ia kane ka Human Rights Commission un khlieh da u chairperson uba long ruh u Chief justice jong ka High Court nalor ki dkhot kiban long u district judge ha ka jylla uba la trei ha ka kam la kumno kumno hynniew snem bad uwei u dkhot yn jied na kito ki briew kiba tip bha ia ki jnit ki jnat jong ka ain kiba iadei bad ki hok briew manbriew.
Kane ka jingbuh ia ka Komishon kan long ka jingangnud jong ki paidbah ka jylla ban iada ia ki hok jongki, la ong u Myntri Rangbah.