Shillong, 13 Nailar:
Ki jaka ot doh baroh khoit hangne ha sor Shil long ki lah ban shah khang noh hadien ba la pyntrei kam ia ka jaka ot doh (abattoir) ba la pynshna da ka sorkar kaba don ha Mawiong.
U Director jong ka Animal Husbandry & Veterinary (AH&V) u Dr JS Jyrwa u la iathuh ba la buh thong ban pyndep ia katei ka jaka ot doh ha u bnai Naiwieng mynta u snem 2013.
Haba iakren mynne ka sngi bad u Rupang u Dr Jyrwa u la iathuh ba hadien ba la dep pyntreikam ia katei ka jaka baroh ki nongshoh doh kim lah shuh ban ot pathar iaki doh ha kino kino ki jaka kiba don ha sor Shillong hynrei ki dei ban leit shoh doh ha katei ka jaka ba la pynkhreh da ka sorkar.
“Ngi la ju khot ka jingiakynduh lang bad ki nongshoh doh ban iakren halor kane ka kam”, la ong u Dr Jyrwa.
U la iathuh ruh ba katei ka jaka ba la pynkhreh da ka sorkar lah ban pyniap tang ia ki masi, ki sniang bad ki Blang bad ka rukom pyniap ia ki mrad ym dei ban shu pyniap im im peit peit, hynrei dei ban pyniapler shwa ban pyniap ia ki.
Ha kane ka jaka shoh doh lah ban pyniap kumba 160 tylli ki masi bad 240 tylli ki sniang bad 240 tylli ki Blang lah ban ot ha ka shisngi bad yn leh ia kane katkum ki tiar ka juk stad mynta.
Ia kane ka projek ba la mang T.22 klur ha kapor ba dang long Symbud Myntri Rangbah u Bah Bindo M Lanong ha snem 2010 bad ka sorkar ka la aiti ia kane ban pyntrei da ka Rapsang Kompeni.
Ha ka jingshisha ka sorkar ka la mut ban pyndep ia kane ka jaka ot doh dang kloi hynrei hadien ba la mih ka jingpyrshah na ka Dorbar shnong Umjapung bad Maiong rim, ka la pynsuki noh ia ka jingthmu jong ka sorkar ban pyndep ia kane ka projek. Kine ki Dorbar shnong ki la pyrshah namar ka jingtieng ba ki jaboh ba mih na ka jaka ot doh ki lah ban tuid sha ki um dih ba don ha katei ka thain.
Hynrei naka liang jong ka sorkar ka la pyntikna ba ki um dih ha katei ka jaka kin ym jaboh namar ba ka sorkar ka la shna ha rukom ba ki jaboh kin ym tuid pathar.
Na bynta kane, ka sorkar ka la ai jinghikai ia ki nongshoh doh jong ka Khasi Jaintia Butcher Association (KJBA ) ha kaba ki briew na ka kompeni jong ka China ka Real Growth Company ki la wan ai jinghikai halor kane ka phang.
Phi don ban ong eiei?