Pynsted ia ka ain shongkurim: Maitshaphrang sha u Dr Mukul

Shillong, 13 Nailur:
Ka Maitshaphrang ka la pynher shithi sha u Myntri Rangbah ka jylla u Dr Mukul Sangma ba u dei ban pynsted wut wut ia ka jingpynlongkam ia ka ain shongkha shongman ne ka Compulsory Registration Marriage Act ha kane ka jylla.
Ha ka dorkhas ba la aiti ha u Myntri Rangbah hynne ka sngi Hatmajai, u convener ka Maitshaphrang u Bah Michael N Syiem u la ong ia ka sorkar ba kan thaw noh ia ki rul khlem pyntud shuh khnang ban pynthikna ia ka jingtreikam jong ain ba la rah ha iing dorbar.
“Ban pynlong ia kane ka ain kaba larkam bad kaba treikam, ngi kyntu ia phi ban thaw noh ia ki kyndon khlem pynslem shuh”,la ong u Bah Michael ha ka shithi sha u Myntri Rangbah ka jylla.
U Bah Michael u la ong ba ka sorkar ka dei ban pynsted mardor ban thaw ia ki kyndon jong ka ain khnang ban iada noh ia ka jingiapait iapra ki longing longsem ha kane ka jylla kaba jur bha khamtam ha kine ki sngi.
Lah ban kdew ba ka jingialang jong ka kynhun myntri mynshem snem, ka la pdiang ia ka Meghalaya Compulsory Registration of Marriage Bill, 2011 bad la pas ruh ha ka iing dorbar Meghalaya.
Kane ka Bill kan kynthup ia ka jingrejister ia ka shongkha shongman jong baroh ki briew kiba dei na kano kano ka jait, kynhun jaitbynriew ne kynhun niam katkum ka rukom ne ka jingleh jongki bad ruh ban rejister lada shongkha biang.